Kókshetaýda Aqmola oblystyq sotynyń ǵımaratynan órt shyqty

<p>KÓKShETAÝ. KAZINFORM - Kókshetaýda Aqmola oblystyq sotynyń ǵımaratynan órt shyqty. Áleýmettik jelidegi jazbadan birneshe órt sóndirý tehnıkasynyń Nazarbaev kóshesiniń boıyndaǵy Aqmola oblystyq soty ǵımaratynyń aldynda turǵanyn baıqaýǵa bolady.</p>

Aqmola oblysy TJD baspasóz qyzmetiniń málimetinshe, órt búgin saǵat 19:56 shamasynda ǵımarattyń 5-shi qabatynan shyqqan.

«Nazarbaev dańǵylyndaǵy ákimshilik ǵımarattyń 5-shi qabatynan (40 sharshy metr aýmaqta) órt shyqty. Tilsiz jaýdy aýyzdyqtaýǵa TJD jeke quramynan 30 adam jáne 8 arnaıy tehnıka jumyldyryldy. Saǵat 20:12-de órt aýyzdyqtalyp, 20:30-da sóndirildi. Zardap shekkender joq, órttiń shyǵý sebebi anyqtalýda», - dedi vedomstvodan.

Aıta ketsek, budan buryn Kókshetaýda jataqhanadan órt shyǵyp, 40 adam evakýatsııalanǵanyn jazǵan edik.