Kókshetaýda adam quqyǵyn qorǵaýdyń ulttyq jáne halyqaralyq mehanızmderi talqylandy
QR Prezıdentiniń janyndaǵy adam quqyqtary jónindegi komıssııa, Eýropadaǵy qaýipsizdik jáne yntymaqtastyq jónindegi uıymnyń (EQYU) Astanadaǵy baǵdarlamalar keńsesi jáne Aqmola oblysy ákimdigi birlesip, jergilikti memlekettik qyzmetshiler, kásipodaq, úkimettik emes uıymdardyń jetekshileri úshin ótkizgen sharaǵa Aqmola oblysy ákiminiń orynbasary Aına Mysyrálimova qatysyp, quttyqtaý sóz sóıledi.
«Barlyq memlekettik organdarda jáne ortalyq, sondaı-aq, jergilikti deńgeıdegi qoǵamdyq ınstıtýttarynda quqyq qorǵaýdyń quramdas bóligi bar. Azamattardyń quqyǵy jáne bostandyǵyn qorǵaý, olardyń máselesin sheshýmen ár deńgeıdegi ákimdikter, saıası partııalar jáne qoǵamdyq birlestikter aınalysady», - dedi Aına Mysyrálimova.
Sonymen qatar, semınarda «Nur Otan» partııasynyń oblystyq fılıaly tóraǵasynyń birinshi orynbasary Ǵalym Bekmaǵambetov, oblystyq ishki saıasat basqarmasynyń basshysy Gúljanar Shókeeva, sondaı-aq, QR Prezıdentiniń janyndaǵy adam quqyqtary jónindegi komıssııanyń hatshysy Tastemir Ábishev, EQYU-nyń Astanadaǵy baǵdarlamalar keńsesiniń adam quqyqtary jónindegi ulttyq úılestirýshisi Gúlmıra Qýanjanova adam quqyqtaryn qorǵaý men kótermeleý salasyndaǵy ózderiniń tájirıbelerimen bólisip, pikirlerin ortaǵa saldy.
Sharada Qazaqstan Respýblıkasyndaǵy adam quqyqtaryn qorǵaýdyń ulttyq jáne halyqaralyq júıesi jan-jaqty pysyqtaldy. Adam quqyqtary jónindegi ulttyq mekemelerdiń sot jáne quqyq qorǵaý organdarymen, basqa da memlekettik organdarmen, sondaı-aq, azamattyq qoǵam ınstıtýttarymen ózara is-qımyly qaraldy.
Komıssııa músheleri men sarapshylary Tastemir Ábishev, Svetlana Jarkenova, Olga Volkova naqty mysaldarmen tyńdaýshylarǵa adam quqyqtary men bostandyqtary týraly ǵana emes, sonymen birge, azamattardyń memleket pen qoǵam aldyndaǵy mindetteri týraly da aıtyp berdi.
Sondaı-aq, Elbasynyń bes ınstıtýtsıonaldyq reformasy men bes áleýmettik bastamalary, halyqqa arnaǵan bıylǵy jańa Joldaýy, olardy iske asyrý tetikteri, «Rýhanı jańǵyrý» baǵdarlamasy aıasynda Qazaqstandaǵy qoǵamdyq sanany jańǵyrtýdyń erejeleri egjeı-tegjeıli talqylandy.
Osyndaı kóshpeli semınarlar Zerendi jáne Sandyqtaý aýdandarynda da ótkizý josparlanǵan.