Kókshetaýda Abaıdyń 175 jyldyǵyna arnalǵan halyqaralyq konferentsııa ótti
Vedomstvonyń málimetinshe, «Abaı tulǵasy: Ulttyq rýhanııat jáne álemdik órkenıet» taqyrybymen onlaın ótken halyqaralyq konferentsııaǵa alys jáne taıaý shet elderden tanymal ǵalymdar men mádenıet qaıratkerleri, fılologtar, tarıhshylar, jas zertteýshiler, joǵary jáne orta arnaýly oqý oryndarynyń oqytýshylary qatysty.
Qatysýshylar aldynda sóz sóılegen aımaq basshysy Ermek Marjyqpaev óziniń sharanyń mańyzdylyǵyna toqtaldy.
«Abaıdyń murasy – ol álem mádenıetiniń altyn qazynasy, onyń esimi qazirgi zamandaǵy uly aqyndarmen qatar turady. Abaıdyń ulylyǵy onyń shyǵarmasynda ǵana emes, ómirlik ustanymda, otansúıgishtiginde jatyr. Bizdiń oblysymyzda jyl bastalǵannan beri uly aqynnyń murasyn nasıhattaýda máni men mańyzy zor sharalar ótkizilýde. Búgingi kúnge deıin ár túrli formatta konferentsııa, chellendj, baıqaý, kórme-lektsııa, ádebı kesh, dekada tárizdi kóptegen sharalar uıymdastyryldy», - dep atap ótti aımaq basshysy.
Ankaranyń áleýmettik ǵylymdar ýnıversıteti saıası ǵylymdar fakýlteti bóliminiń Túrki álemi ınstıtýtynyń dırektory Merıem Hakım, M.Toreza atyndaǵy Máskeý memlekettik lıngvıstıka ýnıversıtetiniń taıaý shetel jáne TMD elderi tili men mádenıeti kafedrasynyń meńgerýshisi Jenıshkýl Hýlhachıeva, Osh memlekettik ýnıversıtetiniń «Jetıgen» mektep-lıtseıiniń dırektory Kyıalbek Akmatov jáne ózge tanymal ǵalymdar men tarıhshylardyń Abaı jáne onyń rýhanı murasy týraly taqyryptarda baıandamalary tyńdaldy. Konferentsııa taqyryptyq sektsııalyq sabaqqa ulasty.
Aıta ketsek, Aqmola oblysynda 150 den astam kóshe, mektepke jáne eldi - mekenge Abaıdyń esimi berildi. Osydan berer kún buryn qazaq tilinde oqytylatyn daryndy balalarǵa arnalǵan oblystyq mamandandyrylǵan №3 mektep - ınternatyna Abaı esimi berilgenin de aıta ketken jón.