Kókshetaýda 40 otbasy jańa páterleriniń kiltin aldy

KÓKShETAÝ. QazAqparat – Naýryz merekesi kúni Kókshetaý qalasynda 40 otbasyna jańa páterleriniń kiltteri tapsyryldy. Baspanaly bolǵandardyń qatarynda páter kezeginde turǵandar men áleýmettik osal toptaǵy otbasylar bar, dep habarlaıdy QazAqparat tilshisi.

Oblys ortalyǵyndaǵy «Saryarqa» shaǵyn aýdanynda salynǵan kópqabatty jańa turǵyn úıden baspanaly bolǵandardy qala ákimi Baýyrjan Ǵaısa qýanyshtarymen quttyqtady.

«Saryarqa» shaǵyn aýdany kúnnen-kúnge kórkeıip, záýlim úıler kóbeıip keletindigi qýantady. Sonyń arqasynda páter kezegin kútken jandardyń máseleleri kezeń-kezeńimen sheshimin taýyp keledi. Búgingi Ulystyń uly kúni 40 otbasynyń baspana máselesi sheshilip otyr. Tapsyrylyp otyrǵan turǵyn úı jaıly, sapaly ekeni sózsiz. Sizderdiń shańyraqtaryńyzdaǵy qýanysh – bizdiń de qýanyshymyz!» - dedi quttyqtaý sózinde qala ákimi Baýyrjan Ǵaısa.

Baspanaly bolǵandardyń biri – qala turǵyny Saltanat Sálimova. Ol osy sátti asyǵa kútip, endi qonys toıyn toılaýǵa daıyndalyp jatyr.

«Búgingi mereke biz úshin erekshe este qalarlyq qýanyshty kún boldy. Qýanyshymyzda shek joq. Jıhaz ben turmystyq tehnıkany ákelý qaldy. Keń dáliz, úlken jaryq bólmeler. Mereke kúni qýanyshymdy eseleı túsken qala basshylyǵyna alǵysym sheksiz», - dep qýanyshymen bólisti jańa baspana ıesi.

Saltanatty shara barysynda jınalǵandarǵa merekelik kontserttik baǵdarlama usynyldy.

Aıta ketsek, Aqmolalyqtar Naýryz meıramyn erekshe toılap jatyr.