Kókshetaýda 1000 orynǵa arnalǵan sport kesheniniń qurylysy bastaldy
Kapsýla salý rásimine oblys ákimi Marat Ahmetjanov qatysty.
«Búgin biz óńirimiz úshin mańyzdy oqıǵanyń kýási boldyq. El Prezıdenti Qasym-Jomart Toqaevtyń halyqty sporttyq nysandarmen qamtamasyz etý jónindegi tapsyrmasy aıasynda biz oblys ortalyǵynda kópfýnktsıonaldy sport kesheniniń qurylysyn bastaımyz», – dep atap ótti oblys ákimi.
Jańa joba týraly áserimen halyqaralyq dárejedegi sport sheberi, álem chempıonatynyń kúmis júldegeri Karına Ibragımova bólisti.
«Kókshetaýlyqtardy osyndaı tamasha oqıǵamen shyn júrekten quttyqtaımyn. Jańa ári zamanaýı jaǵdaılarda sportpen shuǵyldaný – barlyq sportshylardyń kópten bergi armany. Bolashaqta bul oryn sporttaǵy jańa jetistikterge úlken serpilis beretinine senemin», – dedi K.Ibragımova.
Jańa sport kesheni jobasy 1000 orynǵa eseptelgen, munda eki qabatty ǵımarat pen jertóle qabaty qarastyrylǵan. Ǵımaratta teleskopııalyq trıbýnalary bar ámbebap mádenı oıyn-saýyq zaly, ámbebap sport zaly, ústel tennısi zaly, 80 oryndyq konferents-zal, kúres zaly, rıng zaldary, ashana jáne tehnıkalyq bólmeler sııaqty ártúrli fýnktsıonaldy bólmeler ornalastyrylatyn bolady. Qurylys aýdany 11,5 myń sharshy metrden asady.
Qurylysty 2025 jyldyń sońyna deıin aıaqtaý josparlanǵan. Búgingi tańda nysanǵa kirme joldar salyndy, qorshaýlar ornatyldy. Qazanshuńqyrdyń topyraǵy qazylyp, qadalardy ornatý jáne synaý jumystary júrgizildi.
Aıta ketý kerek, Respýblıka kúnine oraı óńirde birqatar áleýmettik nysandar ashylýda.