Kókshetaý ýnıversıtetinde 100-den astam adam evakýatsııalandy

KÓKShETAÝ. QazAqparat – Kókshetaýda joǵary oqý ornynyń ǵımaratynda elektr symdarynyń qysqa tuıyqtalýynan 100-den astam adam evakýatsııalandy, dep habarlaıdy QazAqparat tilshisi.

Aqmola oblystyq TJD baspasóz qyzmetiniń málimetinshe, búgin saǵat 09:44-te «101» pýltine Sh.Ýálıhanov atyndaǵy Kókshetaý memlekettik ýnıversıtetiniń altynshy qabatynda órt shyqqandyǵy týraly habarlanǵan.

«Anyqtalǵandaı, tútin elektr symdarynyń qysqa tuıyqtalýynan shyqqan. Shaqyrtý ornyna TJD jeke quramynan 54 adam jáne 12 arnaıy tehnıka tartyldy. Ǵımartta bolǵan 113 adam evakýatsııalandy. Saǵat 09:50-de mekeme qyzmetkerleri elektr symdarynyń qysqa tuıyqtalýyn joıdy. Jaraqat alǵandar men zardap shekkender joq», – dedi Kókshetaý qalasy Tótenshe jaǵdaılar basqarmasynyń bastyǵy Maksım Shatkovskıı.

Osy rette, Aqmola oblysynyń TJD qyzmetkerleri órt qaýipsizdigi erejelerin saqtaý qajettigin, sondaı-aq, tótenshe jaǵdaı týyndaǵan jaǵdaıda «101» nemese «112» nómirine qońyraý shalýdy eske salady.

Aıta ketsek, Aqmola oblysynda qar qursaýynan 1200-den astam kólik shyǵaryldy.