Kókshetaý turǵyny óńirde birinshi bolyp shetelden ákelingen kóligin tirkedi

KÓKShETAÝ.QazAqparat - Kókshetaý qalasynyń 68 jastaǵy turǵyny Qanat Jumabaev Armenııadan ákelingen avtokóligin resmı túrde tirkedi, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń málimetinshe, Kókshetaý turǵyny «Toyota Camry» avtokóligin ótken jyly ákelgen. Osy jyldyń basynda Eýrazııalyq ekonomıkalyq odaq elderi aýmaǵynan ákelingen kólikterdi tirkeý mindetti jarııalaǵan bolatyn. Sol kezde ózge kólik júrgizýshileri sııaqty Qanatty da kóligin resmı túrde tirkeý úshin iri kólemde qarjy jumsalatyndyǵy tolǵandyrdy.

«Men Úkimettiń sońǵy sheshimine qatty qýandym. Jáne de kóligimdi resmı tirkegen kúni mamandandyrylǵan HQKO baryp, memlekettik nómirimdi aldym. Árıne, avtokólik ıeleriniń ótinishterine qulaq asyp, tirkeý talaptaryn jeńildetkeni úshin rızashylyǵymdy bildiremin», - deıdi kólik ıesi Qanat Jumabaev.

Sonymen qatar, Aıman Qalmaǵanbetova esimdi turǵyn da «Hyunday» avtokóligin tirkep, memlekettik nómirin aldy.

Aıta keteıik, mamyrdyń 20-da QR Úkimeti 2020 jyldyń 1 aqpanyna deıin Armenııadan ákelingen avtokólikterdi tirkeý týraly sheshim qabyldady. Tirkeý 1 maýsym men 1 qyrkúıek aralyǵynda júrgiziledi.

Tirkeý jarnasy – 695 teńge, tirkeý kýáligi úshin tólem – 3 473 teńge jáne memlekettik tirkeý nómiri úshin – 7 778 teńge. Tólemderdiń jalpy somasy - 11 946 teńge.