Kókshetaý sý qubyry jelisindegi apat: medıtsınalyq nysandarǵa sý tasymaldanyp jetkizildi

KÓKShETAÝ. QazAqparat – Kókshetaýda sý qubyry jelisindegi apatqa baılanysty birqatar emdeý mekemeleri men turǵyn úılerge aýyzsý tasymaldanyp jetkizildi, dep habarlaıdy QazAqparat tilshisi.

«Kókshetaý sý arnasy» kommýnaldyq kásipornynyń málimetinshe, aqpannyń 27-sinde apattyq jumystarǵa baılanysty Birjan sal jáne Táshenov kósheleriniń aralyǵyndaǵy, ıaǵnı Qýanyshev pen Esenberlın 150b mekenjaıy boıynsha ornalasqan Kókshetaý qalalyq aýrýhanasy, Aqmola oblystyq balalar aýrýhanasy jáne Perzenthanaǵa aýyz tasymaldanyp jetkizilgen.

Bul týraly oblystyq perınataldyq ortalyqtyń dárigerleri áleýmettik jelige 150 naýqas jatqan (onyń ishinde júkti áıelder men jańa týǵan sábıler bar) perzenthanada sýdyń joqtyǵyn aıtyp, másele kótergen bolatyn.

Qazirgi kezde apat saldary joıylyp, sýmen qamtamasyz etý jumystary qalpyna keltirildi.

Aqmola oblystyq Densaýlyq saqtaý basqarmasynan túsindirgendeı, apattyq jumystarǵa baılanysty kópbeıindi oblystyq aýrýhanada, oblystyq balalar aýrýhanasynda jáne oblystyq perınataldyq ortalyqta sý berý ýaqytsha toqtatylǵan. Sol sebepti, medıtsınalyq obektilerge sý tasymaldanyp jetkizildi jáne qajetti sý qorymen qamtamasyz etildi.

«Qazirgi kezde «Kókshetaý sý arnasy» kommýnaldyq kásiporyn apattyq-jóndeý jumystaryn júrgizip, sý berý qalpyna keltirildi. Joǵaryda atalǵan medıtsınalyq mekemelerdegi jaǵdaı Aqmola oblysy Densaýlyq saqtaý basqarmasynyń erekshe baqylaýynda», - dep túsindirdi vedomstvonyń baspasóz qyzmetinen.

Aıta ketsek, Kókshetaýda janarmaı quıý beketinde jarylys bolyp, operator qaza tapty.