«Kókshetaý – Rýzaevka» tasjolyndaǵy kólik apatynan eki adam kóz jumdy

KÓKShETAÝ. QazAqparat – Aqmola oblysy aýmaǵynda úsh kólik soqtyǵysyp, eki adam kóz jumdy, taǵy eki adam túrli dene jaraqatymen aýrýhanaǵa tústi, dep habarlaıdy QazAqparat tilshisi.

Aqmola oblystyq Polıtsııa departamenti baspasóz qyzmetiniń málimetinshe, jol-kólik oqıǵasy búgin saǵat 13:05 shamasynda «Kókshetaý – Rýzaevka» tasjolynyń 25 shaqyrymynda bolǵan.

«Anyqtalǵandaı, Kókshetaý qalasy baǵytynda júrip kele jatqan Atyraý qalasynyń 25 jastaǵy turǵyny basqarǵan «Gaz-330232» avtokóligi joldyń qarsy baǵytyna shyǵyp ketip, «Vaz-2106» jáne «Lada Kalına» kólikterimen soqtyǵysqan. Saldarynan eki jeńil kóliktiń 35 jáne 71 jastaǵy júrgizýshileri oqıǵa ornynda kóz jumdy. Sonymen birge, «Lada Kalına» kóliginiń eki jolaýshysy túrli dene jaraqatymen aýrýhanaǵa tústi. Qazirgi kezde, osyǵan baılanysty Qylmystyq kodekstiń 345-baby 4-bóligi boıynsha sotqa deıingi tergeý amaldary júrgizilýde», - delingen vedomstvonyń resmı málimetinde.

Aıta ketsek, budan buryn Aqmolada mas júrgizýshilerdiń kinásinen úsh adam kóz jumyp, 36 adam jaraqat alǵanyn jazǵan edik.