Kókshetaý mektebindegi jarylǵysh zatqa baılanysty 600-ge jýyq adam evakýatsııalandy

<p>KÓKShETAÝ. KAZINFORM &ndash; Kókshetaýda qalalyq №4 orta mektebiniń ǵımaratyna jarlyǵysh zat qoıylǵandyǵy týraly habarǵa baılanysty 600-ge jýyq adam evakýatsııalandy.</p>

Aqmola oblysy PD baspasóz qyzmetiniń málimetinshe, shaqyrý ornyna polıtsııa qyzmetkerleri jáne ózge de quqyq qorǵaý organdary men kúshtik qurylymdar, sondaı-aq Kókshetaý qalasynyń shuǵyl qyzmetteri baǵyttaldy. 

«Azamattardyń qaýipsizdigin qamtamasyz etý úshin oqýshylar, muǵalimder jáne mektep ákimshiligi men tehnıkalyq personaldardan turatyn barlyǵy 600-ge jýyq adam evakýatsııalandy. Ǵımaratty saperler, jarylǵysh zattar jumys isteıtin tehnıkter jáne qyzmettik ıtteri bar kınologtar tekserip shyqty, jarylǵysh zat tabylmady. Qazirgi ýaqytta jalǵan habar bergen adam izdestirilip jatyr», - dedi vedomstvodan.

Osy rette, tártip saqshylary terrorızm aktisi týraly kórineý jalǵan habarlaý Qylmystyq kodekstiń 273-baby boıynsha qylmystyq jaýaptylyqqa ákep soǵatynyn jáne osy bap boıynsha qylmystyq jaýapkershilik 14 jastan bastalatynyn eske salady.

Aıta ketsek, budan buryn Aqmola oblysynda astyq saqtaıtyn qoıma órtengenin jazǵan edik.