«Kókshetaý-Qostanaı» trassasynda kólik ınspektorlaryna bir top adam shabýyl jasady

NUR-SULTAN. QazAqparat - Aqmola oblysy boıynsha kóliktik baqylaý ınspektsııasynyń mamandaryna belgisiz adamdar shabýyl jasady. Bul jaıynda QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat tilshisi.

«2020 jyldyń 14 sáýir kúni «Kókshetaý-Qostanaı» aınalma avtojolynda, jyljymaly kóliktik-baqylaý beketinde kezekshilik atqaryp jatqan Aqmola oblysy boıynsha kóliktik baqylaý ınspektsııasynyń mamandary Reseı Federatsııasynda tirkelgen (memlekettik nómiri E006TB72, 57KEA03 tirkemesiniń nómiri) astyq tasymaldaıtyn «KamAZ 53205« markaly kólikti toqtatty. Kólik kabotajdyq júk tasymalymen (QR zańnamasymen tyıym salynǵan) aınalysatynyna kúdik bolǵan», - delingen mınıstrliktiń Telegram-paraqshasynda jarııalanǵan aqparatta.

Vedomstvo málimetinshe, tekserý barysynda júrgizýshi tasymaldanatyn júkke qujattardy usynbaı avtokólik quralyn ólsheý júrgizýden bas tartqan. Avtokólik quralyn memlekettik tirkeý týraly kýálikti ǵana usynǵan. Osydan keıin júrgizýshi avtokólik quralyn toqtaǵan jerinde qaldyryp, belgisiz baǵytqa ketip qalǵan.

Keıin ınspektsııa mamandaryna belgisiz tulǵalar kelip, avtokólikti kóliktik baqylaý ótkizbesten jibere salýdy talap etken. Óz kezeginde beket qyzmetkerleri ózderiniń laýazymdyq mindetterin oryndap, júktiń shyǵý zańdylyǵyn rastaıtyn qujattardy usynýdy talap etti.

«2020 jyldyń 15 sáýirinde saǵat 14:15-te beket mamandaryna memlekettik tirkeý nómiri joq úsh jeńil avtokólikpen (Lexus 470 qara tústi, Toyota Land Cruiser 200 shıe tústi jáne Lada Largus aq tústi) kelgen 5-6 adamnan turatyn belgisiz top shabýyl jasady. Olar beket qyzmetkerleriniń ómiri men densaýlyǵyna qaýip tóndirip, ustalǵan avtokólik quralynyń qujattaryn alyp, kólikti aıdap áketken. Beket qyzmetkerleri kóliginiń dóńgelekterin jaryp ketken», - delingen taratylǵan aqparatta.

Kóliktik baqylaý beketiniń qyzmetkerleri bolǵan oqıǵa týraly dereý «102» nómirine habarlaǵan. Jedel izdestirý is-sharalary barysynda júk kóligi tabyldy. Shabýyl jasaǵan adamdardy izdeý jáne krımınalıstıkalyq jumystardy Aqmola oblysy Polıtsııa departamentiniń qyzmetkerleri júrgizip jatyr.

Aıta keteıik, tótenshe jaǵdaı kezinde osy jyldyń 22 naýryzynan bastap QR Aýyl sharýashylyǵy mınıstrligi bıdaı eksportyna tyıym salǵan bolatyn.