Kókshetaý kóshelerine bılerdiń esimderi berilmek

KÓKShETAÝ. QazAqparat - «Rýhanı jańǵyrý» baǵdarlamasyn júzege asyrý aıasynda Kókshetaý qalasynda Baıdaly bı, Áldebek bı, Bapan bı jáne Saqqulaq bılerdiń esimderimen kóshe ataýlary ózgertiledi, dep habarlaıdy QazAqparat tilshisi.

Aqmola oblystyq sotynyń baspasóz qyzmetiniń málimeti boıynsha Kókshetaý qalasynyń ákimdiginde qala kósheleriniń ataýlaryn ózgertý boıynsha qoǵamdyq tyńdaýlar ótti. Oǵan oblys sýdıalary, Aqmola oblysy boıynsha Sottar ákimshisiniń ókilderi men sot júıesiniń ardagerleri belsendi túrde qatysty. 

Qoǵamdyq tyńdaýǵa qalanyń qurmetti azamattary, qoǵamdyq birlestikterdiń ókilderi, jýrnalıster, Qoǵamdyq keńestiń músheleri, memlekettik organdar jáne jastar uıymynyń ókilderi shaqyryldy.

«Qoǵamdyq tyńdaýda Aqmola oblysynyń sot júıesiniń, Kókshetaý qalasynyń tórt kóshesine Aqmola óńirinde ómir súrgen bılerdiń esimderi, atap aıtqanda, Zapadnaıa kóshesine - Baıdaly bı,  Vostochnaıa kóshesine - Áldebek bı, Novoselov kóshesine - Bapan bı jáne Zavodskaıa kóshesine Saqqulaq bıdiń esimderin berýge usynystar qaraldy.  Qoǵam belsendileri atalǵan usynystardy qoldap, depýtattar kóshe ataýlaryn aýystyrýdy biraýyzdan qoldady», - dep kórsetilgen habarlamada.

«Rýhanı jańǵyrý» baǵdarlamasyn júzege asyrý aıasynda Aqmola oblysynyń sot júıesimen óskeleń urpaqty patrıottyq sezimde tárbıeleý, memlekettik tildiń rólin arttyrý, qazaq halqynyń tarıhı tulǵalarynyń esimderimen eskirgen ákimshilik obektilerdiń ataýlaryn ózgertý maqsatynda, óńirdegi ákimshilik ǵımarattar jáne geografııalyq obektilerdiń ataýlaryn ózgertý boıynsha jumys jalǵasatyn bolady.