Kókshetaý qalasynyń shetki aýdandaryndaǵy kósheler jóndelýde

KÓKShETAÝ. QazAqparat – Kókshetaý qalasynyń ortalyq tusy ǵana emes, shet aımaqtarynda da jóndeý jumystary qarqyndy júrgizilýde. Bul týraly qala ákimi Amangeldi Smaıylov aıtty, dep habarlaıdy QazAqparat tilshisi oblystyq ishki saıasat basqarmasyna silteme jasap.

«Aýyl – el besigi» baǵdarlamasy boıynsha Krasnoıar kentinde 10 aıda 24 kóshe jóndeldi. «Kókshe» mádenıet úıine kúrdeli jóndeý júrgizildi. Kóp uzamaı ol tapsyrylady.

«20-dan astam kósheni qamtı otyryp, jylý qubyryn tolyǵymen aýystyrdyq. Jalpy uzyndyǵy toǵyz shaqyrymǵa jýyq. Jylýǵa buryn-sońdy qosylmaǵan úsh tórt qabatty úı, 15 jeke sektor úıi jáne 12 úsh qabatty úı qosyldy», - dep atap ótti Amangeldi Smaıylov.

Nurly kósh aýylynda úsh kóshege asfalt tóseldi.

«Nurly kósh pen Krasnoıar arasynda 2021 jyldyń kókteminde balabaqshanyń qurylysyn bastaý josparlanǵan», - dedi qala ákimi.

Krasnoıar sol jaǵyndaǵy jańa shaǵyn aýdanda eshqashan asfalt jol bolǵan emes. Bıylǵy jyly jalpy uzyndyǵy úsh shaqyrymdyq kóshege asfalt tóselip, úsh baǵdarsham ornatyldy.

«Al Birlik shaǵynaýdanynda úsh kóshe asfalttaldy. Ekinshi Kókshetaýda da eki shaqyrym jolǵa asfalt tóseldi. Munda mádenıet úıiniń jobasy ázirlendi. Qurylys 2021 jyldyń kókteminde bastalady», - dedi ákim.

Zastantsıonnyı shaǵynaýdanynda segiz kóshe jóndeldi. Qazir munda kóshelerdi ortasha jóndeý jobasy ázirlenýde.

«Beıbitshilik shaǵynaýdanynda kelesi jyly kóshelerdi jóndeý jobasy aıaqtalady. Osynda jáne Shanhaıda jaryqtandyrýmen jáne trotýarmen jańa zamanaýı kósheler paıda bolady», - dep atap ótti qala basshysy.

Sondaı-aq, týbdıspanserge baratyn jol jóndeldi.