Kókshetaý qalalyq aýrýhanasynda ýrologııa boıynsha sheberlik synyby ótti

KÓKShETAÝ. QazAqparat - Kókshetaý qalalyq kópbeıindi aýrýhanasynda jergilikti dárigerler úshin ýrologııa boıynsha operatsııa jasaýdyń birneshe túrinen sheberlik synyby ótti, dep habarlaıdy QazAqparat tilshisi.

Sheberlik synybyna Qazaqstan Respýblıkasy Prezıdenti Іs Basqarmasynyń Medıtsınalyq ortalyǵy aýrýhanasynyń robottandyrylǵan hırýrgııa ortalyǵynyń basshysy, joǵary sanatty ýrolog dáriger Baqtııar Qasymov Astanadan arnaıy kelip qatysty. On tórt jyldan astam eńbek tájirıbesi bar dáriger aqmolalyq áriptesterine ýrologııa salasynda operatsııa jasaýdyń dıimdi ádisterin kórsetti.

Sheberlik synyby aıasynda búırektiń gıdronefrotıkalyq transformatsııasy boıynsha laparoskopııalyq nefrektomııa, búırek kıstasyn laparoskopııalyq kesý, torly protezben transobtýratorlyq slıng ýretrovezıkopeksııa, áıelderdegi stressti kúıde neseptiń ustamaýy boıynsha ýroslıng jáne nesep aıdaý jolyn qalpyna keltirý sııaqty otalar jasaldy. Astanalyq dárigerge joǵary sanatty ýrolog-dáriger Qaıyrly Qulmaǵambetov pen ýrolog-dáriger Valerıı Gagıev kómek kórsetti.

Asıstent ýrolog Valerıı Gagıev sheberlik synyby arqyly óziniń kásibı sheberligin taǵy bir ret shyńdaı tústi. Onyń sózinshe, bul tájirıbe mekeme jumysynyń sapasyn jáne medıtsına qyzmetkerleriniń bilim deńgeıin arttyrady.

«Dárigerler únemi sheberlikterin shyńdaýy kerek, óz daǵdylaryn jetildire otyryp, jaqsylardan úırenýi kerek. Biz ár naýqasqa onyń erekshelikterin eskere otyryp, jeke-jeke qaraýǵa tyrysamyz. Sheberlik synybynyń bizdiń jumysymyzdyń odan ári jetilýine septigin tıgizetini sózsiz», - dedi Valerıı Gagıev.

Kókshetaý turǵyny Aıman Ahmetova birneshe jyl boıy zár shyǵarýda qıyndyqtarǵa tap bolǵan. Qalalyq aýrýhananyń ýrologtary júrgizgen operatsııadan keıin áıeldiń densaýlyq jaǵdaıy aıtarlyqtaı oǵalyp, dertten qulan taza aıyǵyp shyqanyn aıtady.

«Zár ustamaý máselesi 11 jyl buryn, ulym dúnıege kelgennen keıin bastaldy, bastapqyda men bul ýaqytsha qubylys dep oıladym. Alaıda, dert ýaqyt ótken saıyn kúsheıip, jaǵdaıym qıyndaı tústi. Neshe túrli em qoldanyp ta kórdim, odan esh nátıje bolmady. Osy qalalyq aýrýhanada myqty ýrologtar ota jasaıtynyn estip, ádeıi jazyldym. Valerıı Valerıevıchte maǵan mundaı dertti emdeýde keshiktirýge bolmaıtynyn aıtty. Osy otaǵa keliskenime esh ókinbeımin. Kóńil-kúıim tamasha. Júzderi jyly, qoldary jeńil ýrologtar – Qaıyrly Qulmaǵambetov pen Valerıı Gagıevke, sondaı-aq, gınekologııalyq bólimshesiniń meńgerýshisi Ásel Ýahıtovaǵa, anestezıolog Rústem Tájenovke jáne hırýrgııa bólimshesiniń barlyq medıtsınalyq personalyna shynaıy alǵysymdy bildiremin», – deıdi qala turǵyny.

Aıta ketsek, budan buryn aqmolalyqtardy ońaltý sharalary qalaı júzege asyrylyp otyrǵandyǵyn jazǵan edi.