«Kókshetaý-Atbasar» trassasynda jol apaty bolyp, 1 adam kóz jumdy, taǵy 8 adam aýrýhanaǵa tústi

KÓKShETAÝ. QazAqparat – «Kókshetaý-Atbasar» trassasynda eki kólik betpe bet soqtyǵysyp, 1 adam kóz jumdy, taǵy 8 adam túrli dene jaraqatymen aýrýhanaǵa tústi, dep habarlaıdy QazAqparat tilshisi.

Aqmola oblystyq Polıtsııa departamenti baspasóz qyzmetiniń málimetinshe, tamyzdyń 6-da saǵat 16:40 shamasynda Zerendi aýdandyq PB kezekshi bólimine «Kókshetaý-Atbasar» tasjolynyń boıynda, ıaǵnı Aqadyr jáne Shaǵalaly aýyly arasynda jol-kólik oqıǵasy bolǵandyǵy týraly habarlanǵan.

Belgili bolǵandaı, 71 jastaǵy kókshetaýlyq basqarǵan «Taıota Avensıs» kóligi men 31 jastaǵy taǵy bir kókshetaýlyq basqarǵan «Tıga» kóligi betpe bet soqtyǵysqan. Saldarynan «Tıga» kóligi júrgizýshisiniń 65 jastaǵy ákesi (jolaýshysy) oqıǵa ornynda kóz jumdy.

Sonymen birge, «Taıota Avensıs» kóliginiń júrgizýshisi men úsh jolaýshysy (onyń bireýi 14 jastaǵy qyz), «Tıga» kóliginiń júrgizýshisi men úsh jolaýshysy (onyń ekeýi 11 jáne 7 jastaǵy kámelettik jasqa tolmaǵan bala) túrli dene jaraqatymen aýrýhanaǵa jetkizildi.

«Osy oqıǵaǵa baılanysty Qylmystyq kodekstiń 345- babynyń 3 bóligi boıynsha sotqa deıingi tergeý amaldary qolǵa alyndy. Oqıǵanyń mán-jaıy anyqtalýda. Saraptama taǵaıyndaldy», - dep túsindirdi vedomstvodan.

Aıta ketsek, budan buryn Kókshetaýdyń ortalyq kóshesinde kólik janyp ketkendigin jazǵan edik.