«Kókshetaý-1» stantsııasynyń bastyǵy jemqorlyq kúdigine ilindi

NUR-SULTAN. QazAqparat – «QTJ» UK» AQ Aqmola bólimshesiniń «Kókshetaý-1» stantsııasynyń bastyǵy sybaılas jemqorlyq kúdigine ilindi. Bul týraly QazAqparat Sybaılas jemqorlyqqa qarsy qyzmetine silteme jasap habarlaıdy.

Aqmola oblysynyń Sybaılas jemqorlyqqa qarsy qyzmeti «QTJ» UK» AQ júk tasymaly jolynyń Aqmola bólimshesiniń «Kókshetaý-1» stantsııasynyń bastyǵyna qatysty sybaılas jemqorlyq qylmysyn jasaý kúdigi boıynsha sotqa deıingi tergeýdi bastady.

«Ol óziniń orynbasarymen jumys ornynda alkogoldik mas kúıinde bolý faktisiniń anyqtalýyna baılanysty jumystan shyǵarmaý jáne jalpy qamqorlyǵy úshin osy stantsııanyń qyzmetkerinen astyrtyn para alǵany úshin kúdikti dep tanyldy.Kúdiktiler kinásiniń deńgeıi týraly túpkilikti sheshimdi sot shyǵarady», - delingen habarlamada.