«Kóksaraı – qur baıbalam ba, álde sý únemdeýdiń naqty quraly ma?»- respýblıkalyq basylymdarǵa sholý

ASTANA. 13 mamyr. QazAqparat - Qazaq aqparat agenttigi respýblıkalyq basylymdarda 13 mamyr, juma kúni shyqqan ózekti materıaldarǵa sholýdy usynady.

***

Almatyda QR Prezıdenti Nursultan Nazarbaev qala aktıvimen alqaly jıyn ótkizdi. Onda shahardyń búgingi tynys-tirshiligi men keleshegi týraly keleli áńgime qozǵaldy. Osyǵan oraı «Egemen Qazaqstan» gazetiniń juma kúngi nómirinde «Almaty - keleshegi kemel qala» degen taqyryppen kólemdi maqala jaryq kórdi. Basylymnyń atap ótýinshe, Elbasy alqaly jıynda Almatynyń elimizdegi eń iri qala ekenin qaıtalaı otyryp, onyń ósip-órkendeýi kúlli Qazaqstan­nyń damýyna úlken yqpal etetinin jetkizdi. Sondyqtan keshegi basqosýda da qalanyń áleýmettik-ekonomıkalyq damý bolashaǵy men ony týrıstik iri ortalyqqa aı­naldyrýdyń keleshegine erekshe qyzyǵýshylyq bildirilgeni aıtylǵan.

«Keshe Úkimet úıinde Ekonomıkalyq damý jáne saýda mınıstri Qaırat Kelimbetov, «Damý» kásipkerlikti damytý qory» AQ basshysy Lázzat Ibragımova jáne Azııa damý bankiniń vıtse-prezıdenti Shaoıý Jaonyń qa­ty­sýymen shaǵyn jáne orta bıznes sýbektilerin qoldaý maqsatynda eli­mizge qarjy bólý týraly shekti kelisimge qol qoıyldy», - dep jazady «Egemen Qazaqstan» gazeti. Basylymnyń atap ótýinshe, qol qoıý rásimine Premer-Mınıstr Kárim Má­simov qatys­ty. Kelisim boıynsha Qazaqstannyń shaǵyn jáne orta bıznes sektoryn damytýǵa 500 mln. AQSh dollary somasynda qaryz berilmek. Maqala «Nesıe ulttyq valıýtamen alynbaq» degen taqyryppen jarııalandy.

***

Ońtústiktegi alyp joba - Kóksaraı sý rettegishiniń qurylysyna eń aldymen Syr eli qarsy bolǵany belgili. Úkimettiń qaýlysy qabyldanatyn tusta osy óńirdiń depýtattary qoǵamdyq pikir qalyptastyryp, birshama qarsylyq bildirip baqqan. Keıinnen Elbasynyń qatysýymen Kóksaraıǵa arnalǵan máseleler keńinen talqylanyp baryp, joba áreń bekitilgen edi. «Sol alyp jobanyń alǵashqy satysy iske qosylǵany keshe ǵana sekildi edi. Búgingi kúni qyzylordalyq senator Baqbergen Dosmanbetov Kóksaraıǵa qatysty kúrishshilerdiń dabyl qaqqanyn aıtyp, áýel bastan alańdaýshylyqtyń beker bolmaǵanyn alǵa tartty», - dep jazady «Alash aınasy» gazeti. Atalǵan máselege baılanysty basqa da azamattardyń pikirin bilgińiz kelse «Kóksaraı - qur baıbalam ba, álde sý únemdeýdiń naqty quraly ma?» degen taqyrypqa nazar aýdaryńyz.

«Alash aınasy» gazetiniń turaqty «Dat!» aıdarynda jazýshy-dramatýrg, Sh.Aımanov atyndaǵy «Qazaqfılm» AQ prezıdenti Ermek Amanshaevpen aradaǵy suhbat «Men úshin árbir qazaq kórermeni qymbat» degen taqyryppen berildi. Basylymnyń barlyq saýaldaryna tuşymdy jaýap bergen ol: «Jalpy qazaq kınosynyń, qazaq rejısserleriniń tabysyn nemese olardyń deńgeıin qaıta-qaıta saralap, qaıta-qaıta baǵalap nemese túgendep otyratyn jaǵdaı joq. Búgingi tańda qazaq kınosynyń álemdik kıno úrdisindegi ózindik orny bar, jóni bar. Munyń bári ózinen-ózi kelgen joq. Sonyń bárin jasaǵan - sol qazaqtyń rejısserleri», - deıdi.

***

Taıaýda bir aqıqattyń beti ashyldy, ol - Qazaqstannyń shetelderge 119 mıllıard dollardan astam qaryzynyń barlyǵy. Bul - dál búgingi jyldyq ishki jalpy ónimimizden de kóp dúnıe. Mine, dál osy másele arqaý bolǵan maqala «Aıqyn» gazetiniń búgingi sanynda «119 mıllıard qaryz. Bul kimdiki?» degen taqyryppen maqala basyldy. Basylymnyń atap ótýinshe, ulttyq qorlarymyzda 74 mıllıard dollardyń syrtynda altyn-valıýtalyq qazynamyz jatyr. ıAǵnı Qazaqstan syrtqy bereshekterimen kez kelgen ýaqytta eseptese alady. Úreılenetin eshteńe joq. «Desek te, úshinshi aqıqat ta belgili boldy, ol - osy 119 mıllıard dollardan astam qaryzdarymyzdyń ishinde memlekettiń qaryzy bar bolǵany 4,5 mıllıard dollar eken. Qalǵandary - jekeniń qaryzy», - dep jazady gazet.

Kelesi aptanyń bel ortasynda sary qurlyqtyń kóptegen memleketteriniń apaıtós balýandary tegisteı Tashkent shaharyn betke alady. Naqtylap aıtsaq, 19-22 mamyr aralyǵynda Ózbekstannyń astanasynda kúrestiń úsh túri boıynsha Azııa chempıonatynyń jalaýy jelbireıdi. Bul jarysqa tek qatysýshy elderdiń ǵana emes, kúlli álem jankúıerleriniń nazary aýatyny aıdan anyq. Óıtkeni búgingi tańda Azııanyń balýandarymen tórtkúl dúnıe sanasady. Qandaı da dúbirli jarys bolsyn sary qurlyqtyń saıypqyrandary únemi úzdikter sanatynda. Bul pikirdiń dáleldi ári dáıekti ekendigine senimińizdi myǵymdaı túskińiz kelse, «Aıqyn» gazetindegi «Tashkenttegi tartys» degen maqalada keltirilgen derekterge kóz júgirtińiz.

***

«Kazahstanskaıa pravda» gazetiniń jazýynsha, keshe QR Memlekettik hatshysy Qanat Saýdabaevtyń tóraǵalyǵymen Memlekettik rámizder jónindegi respýblıkalyq komıssııanyń el Táýelsizdiginiń 20 jyldyǵyna arnalǵan kezekti otyrysy ótti. Onda Aqmola, Atyraý oblystary ákimderiniń jáne Ádilet mınıstriniń memlekettik rámizderdi paıdalaný ári nasıhattaý jónindegi jumystary týraly esepteri tyńdaldy. Jıyn barysynda Q.Saýdabaev: «Memlekettik rámizder - Egemen Qazaqstannyń bólinbes jáne mańyzdy atrıbýttary. Olarǵa degen memlekettik organdardyń, elimizdiń azamattarynyń kózqarasy bizdiń patrıottyǵymyz ben Otanǵa degen qurmetimizdiń kórsetkishi bolyp tabylady», -dep atap ótken.