Kókpekti aýdanynda 14 áleýmettik nysan boı kótermek - ShQO
Aımaq basshysy Danıal Ahmetov Kókpekti aýdanynyń ákimi Serikqazy Sádýaqasovtyń halyq aldynda jasaǵan baıandamasyn tyńdady.
Jıynǵa qazirgi epıdemıologııalyq jaǵdaıǵa baılanysty aýdan turǵyndary onlaın formatta qatysty.
Birneshe jyl boıy aýdan kóleminde sheshimin tappaı kele jatqan máselelerdiń biri Tassaı aýylyna kireberis jol bolǵan bolatyn.
Ótken jyly «Óńirlerdi damytý 2025» memlekettik baǵdarlamasy aıasynda jolǵa ortasha jóndeý jumystary júrgizildi.
Sonymen qatar «Aýyl – el besigi» jobasy boıynsha Kókpekti aýylynyń kósheleri de jóndeldi.
Jalpy qazirgi ýaqytta Kókpekti aýdanynda 14 joba iske asyrylýda.
«Byltyr oblys ákiminiń bastamasymen kópbalaly jáne az qamtylǵan otbasylarǵa úı salý baǵdarlamasy bizdiń aýdanymyzda da sátti júzege asyryldy. 20 ekipáterli jeke turǵyn úıdiń qurylysy tolyǵymen aıaqtaldy. Olar kópbalaly jáne az qamtylǵan otbasylarǵa kezekpen tabys etildi. 2020 jyly aýdan boıynsha 10 159 sharshy metr turǵyn úı paıdalanýǵa berilgen. Bul kórsetkish 2,7 esege ósip otyr», - dedi Serikqazy Sádýaqasov.
Bıyl Samar aýylynda kópbalaly jáne az qamtylǵan otbasylar úshin 10 ekipáterli jeke turǵyn úı boı kóteredi.
Sondaı-aq atalǵan aýylda ornalasqan 5 qabatty 60 páterli úıge kúrdeli jóndeý júrgiziledi.
Ótken jyldyń qorytyndysy boıynsha Kókpekti aýdanyn taza aýyzsýmen qamtý 18 paıyzǵa ósti.
Búgingi tańda 35 eldi mekende aýyzsý tartylǵan. Bul jalpy aýyldardyń 70%-y.
«Kókpekti aýdanynda byltyr aýqymdy jumystar atqaryldy. Turǵyn úımen qamtamasyz etý kórsetkishi joǵary. Jol qurylysy da oń sheshimin taýyp keledi. Bıyl jol jóndeýge 160 mln teńge bólinip otyr. Sonymen qatar Samar aýylynda jańa sport kesheni salynady. Jalpy 2021 jyly oblys boıynsha «Jumyspen qamtý jol kartasy» baǵdarlamasy aıasynda 22,4 mlrd teńge ıgeriledi. 14 áleýmettik sala, 33 turǵyn úı-kommýnaldyq sharýashylyq jáne ınjenerlik-kóliktik ınfraqurylym nysandary salynady», - dep qorytyndylady aımaq basshysy Danıal Ahmetov.