Kókpardyń erejelerine ózgeris engizildi - Bekbolat Tileýhan

ASTANA. QazAqparat - Astana qalasyndaǵy «Qazanat» ıppodromynda amerıkalyq kovboılardyń baspasóz máslıhatyna qatysqan QR Ulttyq sport túrleri qaýymdastyǵynyń prezıdenti, májilis depýtaty Bekbolat Tileýhan kókparǵa engizilgen birqatar ózgerister týrasynda sóz qozǵady, dep habarlaıdy «QazAqparat» HAA tilshisi.

«Osy «EKSPO-2017» kórmesiniń aıasynda álem chempıonatyn ótkizemiz dep, sheteldegi áriptestermen aqyldasqan kezimizde kókpardyń erejelerin jeńildetý máselesin qarastyrdyq. Qazir ózgerttik. Osy ýaqytqa deıin kókparshylar serkeni qazandyqqa salatyn. Kókpardyń álemdik deńgeıde damýy úshin onyń erejelerin barynsha jeńildetý qajettiligi týdy. Jaraqat alý qaýpi tym kóp. Qazandyqqa soǵylyp, kókparshy ishine birge túsip ketip, jaraqatanyp jatady. Al amerıkalyqtar kez kelgen dúnıeni ózine beıimdep alady. Olarǵa sport túrin qyzyqty kórsete bilý kerek qoı. Amerıkadaǵy áriptester sheńbermen oınaýdy qolǵa alyp jatyr eken. Sondyqtan osy kovboılardyń úlgisin tilge tıek ete otyryp, tájikstandyq jáne ózbekstandyq kókparshylar «sheńberge shapsaq qalaı bolady?» dep usynystaryn bildirdi. Biz ony qabyldadyq», - deıdi Bekbolat Tileýhan.

Qaýymdastyq prezıdentiniń aıtýynsha, 1996 jyly kókparshylardyń qazandyqqa shabatyn tártibi boıynsha ereje qabyldanǵan. Biraq ol ereje tártibimen qazaq pen qyrǵyzdan basqa eshkim oınaı almaı qoıǵanǵa uqsaıdy. Sondyqtan, erejeni barynsha qarapaıym retke keltirý týrasynda sheshim qabyldanǵan.

«Tıisti mamandarmen aqyldastyq. Kókpardyń fılosofııasy bylaı: kókpar - olja, trofeı. Ortaǵa tastaǵan soń «seniń qazanyńa salamyn» dep aıtýdyń ózi onyń fılosofııasyna qaıshy. Adam alǵan oljasyn óziniń aýylyna qaraı tartady. Sol sekildi ortaǵa tastaǵan serkeni óziniń sheńberine tartý kerek degen pikirdi úlken ǵalymdar aıtty. Jalpy kókpar fılosofııasyna sáıkestendirińizder degen soń, solaı ettik. Bálendeı aıyrmashylyq joq. Sol burynǵydaı, salym salý, jekpe-jek bári qalady, tek baǵyty ózgeredi», - deıdi ol.   

Astanada ótetin álemdik jarysqa serkeniń ornyna mýlıaj tartylmaq. Óıtkeni ár túrli elde serke tartýdy ártúrli qabyldaıdy. Qaıshylyqtar týyndamas úshin kókparshylarǵa mýlıaj tartqyzý oılastyrylǵan.

Eske sala ketsek, elordadaǵy «Qazanat» stadıonynda 20-28 tamyz aralyǵynda kókpardan álem chempıonaty ótedi. Aýqymdy jarysqa kórshiles eldermen qatar, AQSh pen Túrkııa elderiniń kókparshylary qatyspaq. Jalpy júlde qoryna 18 mıllıon teńge bólingen. Jeńimpaz komanda 10 mıllıon teńgeni oljalaıdy.