Kókpardan Qazaqstan chempıonaty: «Adaı ata» komandasy «Seıhýndy» oısyrata jeńdi

ASTANA. QazAqparat - Astanadaǵy «Qazanat» atshabarynda kókpardan ótip jatqan Qazaqstan chempıonatynyń jartylaı fınaly aıaqtaldy. Chempıonattyń qola júldesin Mańǵystaýdan oblysynan kelgen «Adaı ata» komandasy men Qyzylorda óńiriniń «Seıhýn» komandasy sarapqa saldy, dep habarlaıdy QazAqparat tilshisi.

Kókpardan 18-shi márte ótkizilip jatqan chempıoanttyń jartylaı fınalyn mańǵystaýlyqtar qarqynmen bastaldy. 20 mınýttyq birinshi kezeńniń alǵashqy úsh mınýtyna jeter-jetpes ýaqytta «Adaı atanyń» temirtaqym kókparshylary aryndy ekpinmen 2 salym salyp jiberdi. Alǵashqy kezeńniń sońyna deıin mańǵystaýlyqtar qarqynynan taıǵan joq. Kezek-kezek salǵan salymdardyń sanyn 10-ǵa jetkizgende, seıhýndyqtar bar-joǵy eki salymmen jaýap bergen edi.

Birinshi kezeńnen keıin 10 mınýttyq úzilisten keıin kókpar qaıta bastalyp ketti. 35 kelilik serkege jarmasa talasqan kókparshylar baryn saldy. Oıynnyń aıaqtalýyna 5 mınýt qalǵan kezde «Adaı ata» komandasynyń bir oıynshysy ereje buzǵany úshin 5 mınýt oıynnan shettetildi. Alaıda «Seıhýn» osy artyqshylyǵyn (4 kókparshyǵa qarsy 3 kókparshy) paıdalana alǵan joq. Tipti tartysty oıyn aıaqtalǵanyna 50 sekýnd ýaqyt qalǵanda «Adaı ata» taǵy bir salym salyp úlgerdi. Qorytyndysy esep: 15:4.

Jeńis - Mańystaýdan kelgen «Adaı ata» komandasynyń enshisinde.

Kókpardan Qazaqstan chempıonatynyń fınalynda Shymkent qalasy men Jambyl oblysynyń kókparshylary baq synasady. Al saǵat 17:00-de «Qazanat» atshabarynda báıge - «Astana kýbogy» bastalady.