Kókónis eksportyna kvota engizý kerek - Baqyt Sultanov

NUR-SULTAN. QazAqparat – Búgin Úkimet otyrysynda jeti aıdaǵy áleýmettik-ekonomıkalyq damýdy talqylaý kezinde QR Saýda jáne ıntegratsııa mınıstri Baqyt Sultanov azyq-túlik baǵasynyń ósýin tejeý úshin qandaı qadamdar jasaý kerek ekenin aıtty, dep habarlaıdy QazAqparat tilshisi.

«Baǵanyń odan ári ósýine jol bermeý úshin shuǵyl túrde tıisti sharalardy qabyldaý qajet dep paıymdaımyz. Birinshiden, ákimdikter bıznes sýbektileriniń ústeme aqylar men shekti baǵalardan asyp ketýine jol bermeýge monıtorıng pen baqylaýdy kúsheıtýdi, sondaı-aq óńir turǵyndaryna belgilengen shekti baǵalar týraly habardy der kezinde jetkizýdi tapsyrýdy suraımyn. Ekinshiden, áleýmettik - kásipkerlik korporatsııalar arasynda taýar jetkizý jóninde naqty óńiraralyq kooperatsııany qamtamasyz etý qajet. Bul rette Aýyl sharýashylyǵy mınıstrligine turaqtandyrý qorlaryna taýarlardy ózara jetkizýdi júzege asyrýǵa múmkindik beretin Erejelerge ózgerister engizýdi tapsyrýdy suraımyn», - dedi B. Sultanov Úkimet basshysyna qarata aıtqan sózinde.

Onyń aıtýynsha, qyrkúıek pen jeltoqsan aralyǵynda shekaralas elder tarapynan kókóniske degen suranystyń artýy baıqalady.

«Ónimniń baqylaýsyz elden shyǵarylýy oryn alǵan jaǵdaıda, osy taýarlar eksportyn kvotalaýdy engizý qajet. Sondaı-aq kókónis pen jemis-jıdek qoımalarynyń fızıkalyq jáne moraldyq turǵydan eskirgenin eskere otyryp, ınvestıtsııalyq sýbsıdııalaý normasyn 25%-dan 50%-ǵa deıin ulǵaıtý qajet. Bul Úkimettiń keńeıtilgen otyrysynda Memleket basshysy bergen tapsyrmany oryndaý aıasynda qajet jáne bıznesti yntalandyrýǵa, egindi jetkilikti mólsherde saqtaýǵa ári baǵanyń kúrt kóterilýine jol bermeýge múmkindik beredi», - dedi mınıstr.