Qoqıqaz mekeni: Aqmola oblysynda týrızm salasy qarqyndy damyp keledi

KÓKShETAÝ. QazAqparat - QR Táýelsizdiginiń 30 jyldyǵy aıasynda Qorǵaljyn aýdanynda «Qorǵaljynǵa kelýge 21 sebep» atty FRIENDS-týry ótkizildi, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.

Vedomstvonyń málimetinshe, óńirdiń baı tabıǵı-mádenı murasyna jurtshylyqtyń nazaryn aýdarý arqyly ishki týrızmdi tanymal etý jáne damytý maqsatyndaǵy shara barysynda ár túrli qaladan qoǵamdyq pikir kóshbasshylary men ornıtologtar keldi.

Qonaqtar 30 adamǵa arnalǵan bólmeli, ashana, jylyjaıy bar qonaq úıge ornalastyryldy.

Meımandar Qorǵaljyn memlekettik tabıǵı qoryǵy ornalasqan UNESCO álemdik tabıǵı murasynyń bir bóligi, IBA negizgi ornıtologııalyq aýmaǵy sanalatyn, QR aýmaǵyndaǵy 511 qustyń 300-den astam túri mekendeıtin óńirge saıahat jasady.

Qorǵaljyn dese kóp adamnyń oıyna aldymen qoryq pen ony mekendeıtin qoqıqazdyń keletini ras. Sebebi atalǵan meken Qazaqstan aýmaǵynda ǵana emes, alys-jaqyn shetelde de keńinen tanys. Bul óńirge ásirese sheteldikter kelýge yntaly.

Týr barysynda qoǵam qaıratkeri, elimizdiń Delfıılik qozǵalysynyń kóshbasshysy, Qorǵaljyn ekologııalyq observatorııasynyń negizin qalaýshy Quralaı Túspekova dostaryna osy tańǵajaıyp ólkege barýdyń 21 sebebin aıtyp berdi.

«Pandemııaǵa deıin Qorǵaljynǵa jylyna 5 myń sheteldik týrıst keletin. Jyldyń mamyr men qyrkúıek aıynyń aralyǵy týrıstik maýsym bolyp tabylady. Ekinshiden, syrttan keletin týrısterdi jergilikti halyqtyń salt-dástúri, turmys-tirshiligi men ulttyq taǵamy qyzyqtyrady. Sol úshin de biz daıyndalyp, ulttyq erekshelikterimizdi, qazaqılyǵymyzdy barynsha joǵary deńgeıde kórsetýge tyrysamyz», - dedi Quralaı Túspekova.

Qonaqjaılyq tanytqan qorǵaljyndyqtarǵa qoǵamdyq pikir kóshbasshylary men ornıtologtar rızashylyǵyn bildirdi.