Qoǵamnyń jemqorlyqqa tózimsizdik mentalıteti qalyptaspaıynsha, ony jeńý múmkin emes - EQYU Ortalyǵynyń jetekshisi

ASTANA. 29 sáýir. QazAqparat - Qoǵamda sybaılas jemqorlyqqa qatysty tózimsizdiktiń bolýy onymen kúreste mańyzdy ról atqarady. Búgin Parlament Májilisinde «Jemqorlyqqa qarsy is-qımyl týraly» zań jobasyn talqylaýǵa arnalǵan eksperttik kezdesý barysynda EQYU Astanadaǵy Ortalyǵynyń jetekshisi Natalıa Zarýdnaıa osylaı málim etti.

«Tórkininde dúnıeqorlyq jatqan jemqorlyq derti qoǵamda búgin paıda bolǵan qubylys emes. Ejelgi grek fılosofy Platon dúnıeqońyzdyq pen paıdakúnemdikti áleýmettik keseldiń biri retinde ataǵan bolatyn. Bul keselden arylmaý qoǵamdy qurtýǵa ákep soǵady», - deıdi N. Zarýdnaıa. Onyń sózine qaraǵanda, Platon zamanynan beri jekelegen azamattar ǵana emes tutastaı memleket zardap shegetin mundaı áleýmettik kemistikpen kúreste adamzat ájeptáýir tájirıbe jınady. Sonyń ishinde EQYU ókili jemqorlyqpen kúreste negizgi tórt baǵytqa toqtaldy.

«Birinshiden, túrli ruqsat berýge qatysty kedergilerdi joıý jolymen memlekettik qyzmetkerler arasynda sybaılas jemqorlyq kórinisteriniń oryn alý múmkindikterin taryltý. Ekinshiden, jemqorlyqqa barǵany úshin jazalaý sharalaryn ázirleý. Úshinshiden, bıliktiń barlyq tarmaǵy qyzmetiniń transparenttiligi. Qoǵamnyń osyny tıimdi baqylaýy júzege assa, onda sybaılas jemqorlyqqa jol beretin jaǵdaılar da tómendeıdi. Bul rette bıýdjettiń ashyqtyǵy men qoǵamnyń aqparatqa degen qoljetimdiligi mańyzdy ról atqarady. Tórtinshiden, qoǵamda sybaılas jemqorlyqqa tózimsizdiktiń bolýy. Bundaı áleýmettik keselmen kúreste belsendilerdi yntalandyryp otyrǵan mańyzdy», - deıdi N. Zarýdnaıa. Onyń sózine qaraǵanda, balalar men jasóspirimderdi mektep qabyrǵasynan bastap sybaılas jemqorlyq áreketterge jol bermeýge úıretý, oǵan tózimsizdikpen qaraýǵa úndeýdiń bereri zor. «Halyqaralyq tájirıbe kórsetkenindeı, qoǵamnyń jemqorlyqqa tózimsizdik mentalıteti qalyptaspaıynsha, jemqorlyqty jeńý múmkin emes», - deıdi EQYU ókili.