Qoǵamnyń barlyq ókili qabyldanatyn zań jobasyn talqylaýǵa qatysa alady

NUR-SULTAN. QazAqparat – Kez kelgen zań ómirimizge normatıvtik kúshi bar qujat bolyp engenshe joba kúıinde ázirlenip, túrli deńgeılerdegi talqylaýlardan ótedi. Bul týraly Ádilet mınıstrligi Zań jobalaý qyzmetiniń úılestirý basqarmasynyń basshysy Albına Áýbákirova baıandady, dep habarlaıdy QazAqparat.

Mamannyń aıtýynsha, jobanyń qoǵam men salaǵa qatysy bar bilikti mamandardyń talqylaýynan ótýi óte mańyzdy.

«Qandaı da bir zańnyń qajettigi týyndaǵan jaǵdaıda ol bastama retinde kóterilip, keıin is júzinde kúshine engenge deıingi aralyqta birneshe kezeńnen ótedi. Sol kezeńderdiń eń mańyzdylarynyń biri – zańǵa qajet tujyrymdamanyń jobasyn ázirleý kezeńi. Qarapaıym tilmen aıtsaq, zań jobasynyń ne úshin qajet ekenin, erteń kúshine engen jaǵdaıda quqyqtyq, áleýmettik-ekonomıkalyq turǵyda áseri qandaı bolatynyn osy tujyrymdama anyqtaıdy», - dedi basqarma basshysy.

Bul oraıda, eń mańyzdysy, tujyrymdama jobasy ázir bolǵannan keıin «Ashyq NQA» portalynda qoǵamnyń talqylaýyna shyǵarylady. Al Zań jobasy qyzmeti máseleleri jónindegi vedomstvoaralyq komıssııanyń músheleri 15 jumys kúni ishinde tujyrymdamaǵa qatysty óz usynystary men eskertýlerin joldaıdy. Ol usynys, eskertýler de «Ashyq NQA» portalyna shyǵarylady.

«Osydan keıin ǵana tujyrymdama jobasy atalǵan komıssııanyń otyrystarynda qaralady. Muny Úkimet janyndaǵy konsýltatıvtik-keńes berý organy dep túsinýge bolady. Bul organ túrli salalar men vedomstvolar arasynda týyndaıtyn usynys-bastamalardy ázirlep, úılestirý úshin qurylǵan.

Eldegi zańnamanyń ýaqyt talabyna saı jetile túsýine birden-bir múddeli organ da osy komıssııa. Onyń quramyna Parlament depýtattary, memlekettik organdardyń ókilderi, úkimettik emes uıymdar men bıznes qaýymdastyqtardyń ókilderi kiredi. ıAǵnı, qabyldanýǵa usynylǵan zań jobasy ómirine áser etetin qoǵam toptarynyń barlyq ókilderine zańnyń jobasyn ázirleý kezinen bastap bul protseske belsendi qatysýǵa múmkindik jasalǵan», - dep túsindirdi Albına Áýbákirova.

Onyń málimetinshe, komıssııa qaralyp jatqan zań erteń kúshine engen kezde bir máseleni rettegenimen, qosymsha qıyndyqtar týǵyzbaý úshin yqtımal saldaryn jan-jaqty zerttep, talqylaıdy. Qazirgi tańda COVID-19 pandemııasynyń táýekelderin eskerip, komıssııa otyrystary onlaın-rejımde ótkizilip júr.

«Komıssııa otyrystarynyń bolatyny Ádilet mınıstrliginiń resmı saıtynda jarııalanyp otyrady. Bolashaqta zań jobasyn ázirleýshi memlekettik organdar komıssııa otyrystarynyń bolatynyn Instagram men Facebook arqyly jarııalaıdy dep josparlanyp otyr. Bul azamattardyń zańnamadaǵy ózgeristerden anaǵurlym habardar bolyp otyrýyna jol ashady.

2021 jyly komıssııanyń 41 otyrysy ótti. Sol otyrystarda 58 zań jobasynyń tujyrymdamasy, Parlament depýttatary bastamashy bolǵan 41 zań jobasyna Úkimettiń bergen qorytyndysy, sondaı-aq, 9 Úkimet qaýlysy qaraldy. Sonyń ishinde byltyr jergilikti deńgeıdegi ákimderdi saılaý, azamattyq zańnamany, densaýlyq saqtaý salasyn jetildirý, qylmystyq zańnamany ońtaılandyrý, Áleýmettik kodeks tujyrymdamasy sııaqty eldiń nazarynda bolǵan qujattar boıynsha otyrystar ótkenin atap ótý kerek», - dedi basqarma basshysy.