Qoǵamdyq tamaqtaný oryndary onlaın-jetkizýdi belsendi paıdalanbaq

NUR-SULTAN. QazAqparat - Qoǵamdyq tamaqtaný oryndary onlaın jetkizý qyzmetin paıdalanýlary qajet. Bul týraly búgin Ortalyq kommýnıkatsııalar qyzmetindegi brıfıngte QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Qoǵamdyq tamaqtaný oryndarynyń da jumys ýaqyty saǵat 22-00-ge deıin, bir ýaqytta kelýshilerdiń sany 50 adamǵa deıin shekteledi. Sonymen qatar biz kásipkerlerge «múmkinshilikter terezesin« ashýǵa keńes beremiz. Dámhanalar, meıramhanalar men ashanalar sanıtarlyq qaýipsizdiktiń barlyq normalaryn saqtaı otyryp, onlaın jetkizý múmkindigin belsendi paıdalana alady», - dedi Baqyt Sultanov.

Onyń atap ótýinshe, saýda jáne qyzmet kórsetý salasynyń barlyq nysandary ústelderdi, oryndyqtardy, eskalator jıekterin, baspaldaqtar men esikterdi, lıftini ár saǵat saıyn jáne edendi úsh saǵat saıyn zararsyzdandyryp otyrýy tıis. Ǵımarattyń aýasyn da jeldetip otyrýǵa mindetti.

«Sanıtarlyq normalardy kúsheıtý jónindegi usynymdardy saqtaýlaryńyzdy suraımyn. Bizdiń azamattarymyzdyń densaýlyǵy men ómiri óte qundy», - dedi mınıstr.