Qoǵamdyq tamaqtaný oryndary qantty mınıstrlik ýáde etken baǵamen ala almaı otyr

NUR-SULTAN. QazAqparat – Qazaqstan qoǵamdyq tamaqtaný qaýymdastyǵy Aýyl sharýashylyǵy mınıstrligi ýáde etken qantty arnaıy baǵamen satyp alý protsesiniń keshigip jatqanyn málimdedi, dep habarlaıdy QazAqparat tilshisi.

«2 tamyzda bizdiń qaýymdastyqqa Aýyl sharýashylyǵy vıtse-mınıstri qanttyń arnaıy baǵamen beriletinin málim etti. Oǵan ruqsat ta berdi. Al endi taıaýda Úndi qantyna qatysty qylmystyq is qozǵalǵany belgili boldy. ıAǵnı onyń quramynan densaýlyqqa zııan tuzdar tabylypty. Biraq kásipkerler 21 kún boıy aýyl sharýashylyǵy mınıstrligi ýáde etken baǵamen qant ala almaı keledi», - dedi qaýymdastyq ókili Veronıka Nurpeıisova elorda kásipkerlerimen kezdesý barysynda.

Bul aqparatty Nur-Sultan qalasy ákimniń orynbasary Erlan Bekmurzaev rastady. Onyń aıtýynsha, aýyl sharýashylyǵy vıtse-mınıstri Úndistannan ákelinetin qanttyń bir bóligin berýge ýáde etken. Degenmen qazir Úndi qantynyń quramyna baılanysty eldiń birneshe óńirinde tekseris jumystary júrip jatyr.

«Osyǵan baılanysty Saýda jáne ıntegratsııa mınıstri Serik Jumanǵarın senbi kúni bizdi jınady. Mınıstrlikke qosymsha qant satyp alý tapsyryldy. Atap aıtqanda, vedomstvo qosymsha kelisimshart jasasqan. Endi atalǵan tekseris jumystarynyń nátıjesin kútpeı, jańa shart negizinde qant ákelinedi», - dep túsinikteme berdi Erlan Bekmurzaev.

Eske salaıyq, buǵan deıin Aýyl sharýashylyǵy mınıstrligi kúzge qaraı elimizge qant jetkizý jaǵdaıy turaqtalyp, baǵa túsetinin málimdep edi.