Qoǵamdyq sanany jańǵyrtý gýmanıtarlyq bilimdi jańartý arqyly júrgiziledi - sarapshy

ASTANA. QazAqparat - Qoǵamdyq sanany jańǵyrtý gýmanıtarlyq bilimdi jańartý jáne qoǵamnyń onyń jańa ımperatıvterin qabyldaý arqyly júrgiziledi. Mundaı pikirdi Armenııanyń Ekonomıkalyq zertteýler ortalyǵynyń basshysy, ekonomıka ǵylymdarynyń doktory, professor Ashot Tavadıan bildirdi, dep habarlaıdy QazAqparat.

«Qazaqstan Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» maqalasy bul - Qazastannyń bolashaq qoǵamy damýynyń jalpy kórinisi. Sanany jańǵyrtý - bul qoǵamnyń barlyq múshelerimen ajyratylatyn biregeılik, qunydylyqtar jáne mádenı jadylar. Qoǵamdyq sanany jańǵyrtý gýmanıtarlyq bilimdi jańartý jáne qoǵamnyń onyń jańa ımperatıvterin qabyldaý arqyly júrgiziledi. Atalǵan baǵdarlamalyq maqaladaǵy jańǵyrýdyń negizgi ımperatıvteri básekege qabilettilik, pragmatızm, bilimniń joǵary qundylyqtary men bilim jáne sananyń ashyqtyǵy bolyp tabylady», - dedi professor. 

Onyń atap ótýinshe, Qazaqstanda Táýelsizdik jyldary ishinde bilim salasynyń sapasyn, básekege qabilettiligin jáne halyqaralyq ǵylymı-bilim keńistikke tıimdi yqpaldasýyn qamtamasyz etý úshin kóptegen jumys atqaryldy.
«Baǵdarlamalyq maqalada qoǵamdyq sanany jańǵyrtýdyń basty jobasy retinde «Jańa gýmanıtarlyq bilim. Qazaq tilindegi 100 jańa oqýlyq» jobasy usynylyp otyr. Maqsat aıqyn - óz salasyndaǵy biliktiligi joǵary mamandardy ǵana damytyp qoıý emes, sonymen birge qazirgi zaman men bolashaqty jańa túsinetin, ózgeristerge daıyn, aldyńǵy qatarly tájirıbelerdi tıimdi úırenip, qoldanýǵa qabiletti tulǵany qalyptastyrý», - dedi Ashot Tavadıan.

Ǵalym qazaqstandyq qoǵam «Bolashaqqa baǵdar: rýhanı jańǵyrý» baǵdarlamalyq qujatyn basshylyqqa ala otyryp, alǵa qoıǵan maqsattaryna jetetindigine, al memleket álemniń eń damyǵan 30 eliniń qataryna qosylaryna senimdi ekendigin basa aıtty.