Qoǵamdyq sanany qalyptastyrýda azamattyq sektordyń orny erekshe – Ońdasyn Orazalın
On jyldyń qorytyndysyna arnalǵan shara «Dıalog. Yntymaqtastyq. Jaýapkershilik» taqyrybynda ótti. Oǵan oblys ákimi Ońdasyn Orazalın qatysyp, azamattyq qoǵamnyń mańyzyna toqtaldy.
«Aqtóbe oblysynyń Úkimettik emes uıymdary qaýymdastyǵy óńirimizdiń qoǵamdyq-saıası ómirinde ózindik orny bar bedeldi uıym. Azamattyq sektor – qoǵamymyzdyń qozǵaýshy kúshi. Qoǵamdyq sanany qalyptastyrýda azamattyq sektordyń orny erekshe ekendigi belgili. Sondyqtan bizdiń elimizde azamattyq qoǵam ınstıtýttaryn qoldaý, memlekettik mekemeler men úkimettik emes uıymdardyń qoıan-qoltyq jumys jasaýy birizdilikke qoıylǵan. Memleket basshysynyń Joldaýynda osy baǵytta qoıylǵan mindetterdi tıimdi júzege asyrý azamattyq qoǵamnyń odan ári nyǵaıýyna yqpal etedi. Sol sebepti úkimettik emes uıymdar sektorymen birge ózara qarym-qatynasty odan ári nyǵaıtý – árbir memlekettik organnyń basty nazarynda bolýy tıis», - dedi Ońdasyn Orazalın.
Óńir basshysy 30-ǵa jýyq uıym jetekshilerin azamattyq qoǵam ınstıtýttaryn damytýǵa qosqan úlesi jáne mańyzdy áleýmettik problemalardy sheshýge atsalysqany úshin alǵys hattarmen, Aqtóbe qalasynyń 150 jyldyǵyna arnalǵan merekelik medalimen marapattady.
Sonymen qatar, «Halyqaralyq ıadrolyq qarýǵa qarsy «Semeı-Nevada» qozǵalysy» qoǵamdyq qory Batys Qazaqstan aımaqtyq fılıalynyń dırektory, professor Іzimǵalı Kóbenov oblys ákimi Ońdasyn Orazalınge qoǵamdyq birlestiktiń arnaıy medalin jáne Oljas Súleımenovtiń kitabyn tabystady.
Aıta keteıik, qazirgi kezde oblysta 764 kommertsııalyq emes uıym tirkelgen. Onyń ishinde qoǵamdyq birlestikter – 404, qoǵamdyq qorlar – 205, zańdy tulǵalar birlestigi – 30, jekemenshik mekemeler – 125. Tek 100-den astam úkimettik emes uıym belsendi jumys isteıdi.
«Táýelsizdik alǵannan soń qoǵam belsendiligi kúsheıdi. Qazirgi kezde óńirde 700-den astam ÚEU tirkelgenimen bári birdeı jumys istep turǵan joq. Qoǵamdyq-saıası kúsh retinde úlken is tyndyrýǵa bolady. Máselen, Zhas Project jobasy jastarǵa kedergisiz múmkindik syılady. Men Aqtóbe oblysynyń úılestirýshisi boldym. Bizden 165 joba maquldandy, 165 mıllıon teńge qaıtarymsyz aqsha berildi. Túsingen adamǵa – bul úlken múmkindik», - dedi Eńbek Eri Quralaı Baımenova.