Qoǵamdyq orynǵa kúısandyq ornatqan kásipker vandaldarǵa renish bildirmedi

ASTANA.QazAqparat - Jerasty ótkeline elordalyqtar úshin kúısandyq ornatyp áleýmettik jelilerde keń tanylǵan kásipker Ashat Soltanov aspapty búldirýshilerge esh renish bildirmeıdi, dep habarlaıdy QazAqparat tilshisi.

Elordalyq qarapaıym kásipker Ashat qaıyrymdylyq jasap, qala turǵyndary úshin qoljetimdi, ıaǵnı «Han Shatyr» oıyn-saýyq ortalyǵyna qarama-qarsy ornalasqan jerasty ótkeline pıanıno ákelip qoıdy.
«Tek biraz adamdardyń kúısandyqta oınaǵany bolmasa, atap aıtatyndaı búldirý, qıratý áreketteri bolǵan joq. Kópshilik arasynda eger áldene jalpyǵa ortaq bolsa, demek ol eshkimdiki emes, oǵan qalaı bolsa, solaı qaraýǵa bolady, degen túsinik bar», - dedi ol pıanınonyń synǵan perneleri jáne qaqpaǵynyń tireýishine qarap.
Onyń pikirinshe, adamdarǵa senim artqan jaǵdaıda, erte me kesh pe olardyń kózqarasy ózgeredi. Al, kúısandyq elimizde jańa talanttardyń shyǵýyna sebepker bolýyna yqpal etetin aspap qana.
Kásipker sondaı-aq, kúısandyq qoǵamdyq orynǵa qoıý ıdeıasy qaıdan kelgendigin de aıtyp ótti.
«Jumystan qolymyz bosaǵan ýaqytta saıahat jasaǵandy jaqsy kóremiz. Ár túrli elderde qalalardaǵy atmosferany jaǵymdy ári mádenıetti etip kórsetetin tustaryna jete nazar aýdaratynymyz da ras. Qarapaıym saıabaqta kez-kelgen adam otyryp oınaýǵa bolatyn kúısandyqtyń turǵany keremet emes pe?! Nemese jaǵalaýda mýzyka oınap turady, eresek juptar sol jerde bas qosyp, tango bıleıdi. Bizdiń elimizde de osyǵan uqsas erekshe dúnıe jasaý únemi oıymda júrgen bolatyn», - deıdi ol.
Soltanov bul oılaryn jasyryp qalmaı, Feısbýktegi paraqshasynda jarııalady. Onyń aıtýynsha, oıyna alǵan maqsatyna «Astana» áleýmettik kásipkerler korporatsııasy dırektorynyń orynbasary Baýyrjan Qankın qoldaý bildirgen.