Qoǵamdyq monıtorıng: Qazaqstan qalalarynda baqylaýshylardyń jumys toby qurylady

ALMATY. QazAqparat – Qazaqstan óńirleri men qalalarynda qoǵamdyq monıtorıng salasynda baqylaý júrgizetin jumys toptary qurylady. Bul jóninde QR Densaýlyq saqtaý mınıstrligi men «Qoǵamdyq baqylaý jáne monıtorıng» respýblıkalyq qoǵamdyq birlestigi arasynda qol qoıylǵan memorandýmda aıtylǵan, dep habarlaıdy QazAqparat.

Densaýlyq saqtaý mınıstri Alekseı Tsoı Almaty qalasyna sapary aıasynda Qoǵamdyq monıtorıng tobynyń jetekshisi Saıda Taýkelovamen kezdesti. Júzdesýde Densaýlyq saqtaý mınıstrligi men «Qoǵamdyq baqylaý jáne monıtorıng» respýblıkalyq qoǵamdyq birlestigi arasynda yntymaqtastyq týraly memorandýmǵa qol qoıyldy.

«Taraptar medıtsınalyq uıym, onyń ishinde koronavırýs indetine jáne pnevmonııaǵa qarsy kúreske tartylǵan statsıonarlyq emdeý mekemeleri, dárihanalar men dárihanalyq kóterme saýda qoımalary, sondaı-aq qaıyrymdylyq jáne gýmanıtarlyq kómekti bóletin uıymdar qyzmetiniń tıimdiligin, ashyqtyǵyn arttyrý jónindegi maqsattardy iske asyrýda ózara is-qımyl jasaýǵa nıetti.

Budan basqa, halyqty sybaılas jemqorlyqqa qarsy is-qımyl protsesine tartý jáne azamattardyń memleket pen jergilikti basqarý organdarynyń qyzmetine senim arttyrý úshin qoǵamdyq múddelerdi qorǵaýǵa baǵyttalǵan azmattyq bastamalardy iske asyrý sheńberindegi yntymaqtastyq kózdelgen», - dedi Densaýlyq saqtaý vedomstvosynan.

QR Densaýlyq saqtaý mınıstrligi men «Qoǵamdyq baqylaý jáne monıtorıng» RQB densaýlyq saqtaý salasynda uzaq merzimdi áriptestik baılanysty damytýǵa yqpal etetin jaǵdaı jasaýǵa, sondaı-aq ornyqty jáne úılesimdi damý qaǵıdattaryna sáıkes qoǵamdaǵy oń ózgeristerge baǵyttalǵan jobalardy qalyptastyrý jáne qoldaý boıynsha praktıkalyq qadamdardy júzege asyrýǵa kelisti.

Atap aıtqanda, Qazaqstan óńirleri men qalalarynda gýmanıtarlyq jáne áleýmettik mańyzy bar jobalardy birlesip iske asyrý, qoǵamdyq monıtorıng salasynda baqylaý júrgizetin jumys toptaryn qurý josparlanǵan.
A.Tsoı atap ótkendeı, QR Densaýlyq saqtaý mınıstrligi medıtsınalyq kómektiń sapasyn jaqsartý jáne dári-dármekpen úzdiksiz qamtamasyz etý maqsatynda osy jumys formatyn qoldaıdy.

Eske salaıyq, búgin A.Tsoı Almatyǵa sapary barysynda qala ákimi Baqytjan Saǵyntaevpen jáne medıtsına qyzmetkerlerimen kezdesti.

Mınıstr bastaǵan delegatsııa qalalyq №7 aýrýhanada boldy.

Odan keıin Alekseı Tsoı sanepıdbaqylaý, medfarmbaqylaý aýmaqtyq departamentteri mamandarynyń qatysýymen KVI-men kúres jónindegi shtabtyń kóshpeli otyrysyn ótkizdi.

Odan ári vedomstvo basshysy medıtsınalyq nysandardyń halyqty jappaı vaktsınalaýǵa daıyndyǵyn tekserdi.