Qoǵamdyq keńester halyq pen bıliktiń arasyndaǵy dánekerge aınalýǵa tıis - Toqaev

QONAEV. QazAqparat - Qazaqstan Prezıdenti Qasym-Jomart Toqaev Almaty oblysy jurtshylyǵymen kezdesýde qoǵamdyq baqylaýdyń mańyzdy ról oınaıtynyn atap ótti, dep habarlaıdy QazAqparat.

«Biz Prezıdenttik basqarý úlgisin ustanamyz. Parlamenttiń rólin arttyra túsemiz. Osy oraıda, men myna máselege erekshe nazar aýdarǵym keledi.

Elimizde qoǵamdyq baqylaýdy barynsha kúsheıtý qajet. Búginde elimiz boıynsha 256 qoǵamdyq keńes bar. Byltyr «Qoǵamdyq keńester týraly» zańǵa ózgerister engizildi. Olardyń quzyry edáýir keńeıdi.

Men osy salaǵa azamattyq qoǵam ókilderin kóptep tartýdy tapsyrdym», - dep atap ótti Prezıdent.

Onyń aıtýynsha, qazir olardyń úlesi 86 paıyzǵa jetken.

«Bıyl Ulttyq quryltaı qurylǵanyn bilesizder. Oǵan árbir óńirdiń qoǵamdyq keńesinen bir ókil múshe boldy. Qoǵamdyq keńester halyq pen bıliktiń arasyndaǵy dánekerge aınalýǵa tıis. Kelisim bolsa, kez kelgen máseleniń sheshimi tabylady. Sondyqtan, halyqtyń ókili retinde belsene jumys isteý qajet.

Turǵyndar ózderińiz arqyly memleket basqarý isine qatysady. Qoǵamdyq baqylaýdy júzege asyrady. Bıýdjet qarajatynyń qalaı jumsalyp jatqanyn qadaǵalaıdy. Ózekti máselelerdi bılik organdaryna jetkizedi. Osylaısha, qoǵamdyq keńes elge memleket saıasatyn túsindiredi. Bir sózben aıtqanda, qoǵamdyq keńesterge zor jaýapkershilik júktelip otyr.

Osy keńesterdiń el ishindegi bedelin arttyrýǵa basa mán berý kerek. Onyń músheleri túıtkildi máselelerdi batyl kóterip, ony sheshý joldaryn usynýy qajet. Turǵyndardyń talap-tilegine árdaıym qulaq asyp otyrǵan jón.

Jurt sonda ǵana qoǵamdyq keńeske senim artyp, qoldaý kórsetedi. Halyq óz pikirin bılikke keleli keńester arqyly jetkizýi kerek. Sondyqtan memlekettik organdarmen birlesip, úılesimdi jumys jasaý qajet», - dep túıindedi Memleket basshysy.

Foto: t.me/bort_01