Qoǵamdyq kelisim keńesteriniń áleýetin áleýmettiń ál-aýqatyn kóterýge jumsaý kerek
Forým aıasyndaǵy dóńgelek ústelde bas qosqan Qazaqstan halqy Assambleıasy Tóraǵasynyń orynbasary – Hatshylyq meńgerýshisi Janseıit Túımebaev, Almaty qalasynyń ákimi Baqytjan Saǵyntaev, QR Parlamenti depýtattary, Assambleıa keńesiniń, Qoǵamdyq kelisim keńesteriniń, QHA Ǵylymı-sarapshylyq keńesiniń músheleri, memlekettik organdar men etno-mádenı birlestikter ókilderi halyq turmysynyń sapasyn jaqsartý jónindegi máselelerdi talqylap, qoǵamdyq kelisim Keńesteriniń rólin arttyrý, jalpymemlekettik mindetterdi sheshý joldaryn sarapqa saldy.
Búgin forým taqyrybyna tuzdyq bolǵan kún tártibi Prezıdent Joldaýynda mańyzdylyǵyna mán artylǵan máseleler men tapsyrylǵan mindetterdi júzege asyrý maqsatynan týyndaıdy. Prezıdent Qasym-Jomart Toqaev eldiń turaqtylyǵy men damýy úshin qoǵamdyq dıalog alańdarynyń jumysyn jandandyryp, ózektiligi men belsendiligin arttyrýdy tapsyrǵan bolatyn. Forým barysynda sóz alǵan qabyldaýshy tarap, Almaty qalasynyń ákimi, qalalyq Qazaqstan halqy Assambleıasynyń tóraǵasy Baqytjan Saǵyntaev osy maqsatta ońtústik astana boıynsha atqarylyp jatqan jumystardy tanystyryp ótti. Sondaı-aq, qoǵamdyq kelisim keńesteriniń aımaqta atqaryp otyrǵan jumysyna oń baǵa berdi.
«Prezıdent óz Joldaýynda qoǵam nazaryn ár adamdy alańdatatyn mańyzdy máselelerge aýdartyp qana qoımaı, ony sheshý joldaryn da usyndy. Bul Qazaqstan azamattarynyń zańdy múddeleri men quqyǵyn qamtamasyz etý jolyndaǵy batyl qadam boldy. Prezıdent Joldaýy ekonomıkalyq jáne áleýmettik teńsizdikti joıyp, áleýmettik ádilettilik prıntsıpterin ústem etýge jáne eń bastysy, eńbekke yntalandyrýǵa jaǵdaı týǵyzýǵa baǵyttalǵan», - degen Qazaqstan halqy Assambleıasy Tóraǵasynyń orynbasary J.Túımebaev Ol Joldaýdan týyndaıtyn túıin, azamattardyń óz máselesin ózi sheshý múmkindikterin arttyrýǵa jaǵdaı jasaý kerek dedi.
«Búginde Assambleıa aldynda Qazaqstan Respýblıkasy Prezıdentiniń Joldaýynan týyndaǵan aýqymdy mindetter men maqsattar tur. Sonyń biri, jalpyulttyq qoǵamdyq dıalogty jolǵa qoıý – Assambleıa janyndaǵy qoǵamdyq kelisim keńesteriniń basty maqsaty bolmaq», - degen Janseıit Túımebaev.
Ol Qoǵamdyq kelisim keńesteriniń aýqymyn keńeıtý arqyly, oǵan halyqtyń basym bóliginiń qatystyrylýyn qamtamasyz etý kerek, bul halyq ishinen muqtaj jandardy taýyp, olarmen tikeleı jumys jasaýǵa múmkindik beredi dep atap kórsetti.
Sandy sarapqa bolsaq, búginde el ishinde Assambleıanyń 23 myńnan astam adam toptasqan 2 786 Qoǵamdyq kelisim keńesi jumys jasaýda. Onyń ishinde 14-i oblys ortalyqtarynda, 3-ýi Nur-Sultan, Almaty, Shymkent qalalarynda, 42-si qalalarda, 167- aýdandarda, 2426-y – aýyldyq jerlerde, sondaı-aq, 134-i mekeme-kásiporyndarda qurylǵan.
Forým aıasynda qatysýshylarǵa «Qazaqstan halqy Assambleıasynyń Qoǵamdyq kelisim keńesteriniń jumysy» kórmesi tanystyryldy. Munda qatysýshylardyń nazaryna eldiń ár aımaǵyndaǵy qoǵamdyq kelisim keńesteriniń atqaryp otyrǵan jumystary týraly aqparat usynyldy. Jáne Assambleıanyń bir shańyraǵyna biriktirilgen barlyq etnos ókilderi ózderiniń salt-dástúri men mádenıetinen maǵlumat beretin tarıh jádigerleri men qolóner buıymdaryn usyndy.
Sondaı-aq, forým barysynda «Qoǵamdyq kelisim keńesiniń jumysynda medıatıvti tehnologııalardy paıdalaný» trenıngi uıymdastyryldy.