Qoǵamdyq qaýipsizdikti qamtamasyz etý tujyrymdamasy talqylaýǵa shyǵaryldy

ASTANA. QazAqparat – Qoǵamdyq qaýipsizdikti qamtamasyz etý tujyrymdamasynyń jobasy talqylaýǵa shyǵaryldy. Bul týraly ІІM ókili Shuǵyla Turlybek aıtty, dep habarlaıdy QazAqparat tilshisi.

«Іshki ister mınıstrligi qoǵammen birlesip, Qoǵamdyq qaýipsizdikti qamtamasyz etý tujyrymdamasynyń ázirlenip jatqan jobasyn qoǵamdyq talqylaýǵa shyǵarady. Bul strategııalyq qujat «halyq únine qulaq asatyn memleket» qaǵıdatyna sáıkes qoǵamnyń naqty suranystaryna baǵdarlana otyryp daıyndalady. Onyń damýyna qoǵam, halyqaralyq jáne ulttyq sarapshylar, ǵylymı qoǵamdastyq belsendi qatysady», - dedi Shuǵyla Turlybek mınıstrliktiń baspasóz qyzmeti alańynda ótken brıfıngte.

Onyń atap ótýinshe, tujyrymdamanyń negizgi maqsaty: azamattardyń ómirin, densaýlyǵyn, múlki men quqyqtaryn qylmystyq qol suǵýshylyqtan qorǵaýdy kúsheıtý; qaýipsiz qoǵam qurý; qoǵamdyq qaýipsizdikti qamtamasyz etýdiń qoldanystaǵy tetigin ǵylymı derekter men áriptestikke negizdelgen qazirgi zamanǵy preventsııa júıesine transformatsııalaý úshin jaǵdaı jasaý;

«Tujyrymdama aıasynda memlekettik organdar men ákimdikterdi jaýapkershilikpen tartý, barlyq múddeli taraptarmen jáne azamattarmen áriptestik ornatý, sondaı-aq qoǵamdyq qaýipsizdik máseleleri boıynsha eseptiliktiń ashyq júıesin qurý josparlanyp jatyr. Budan basqa, onda bıýrokratııalyqtan qoǵam suranystaryna baǵdarlanǵan polıtsııa jumysynyń adamǵa baǵyttalǵan modeline kóshý jónindegi is-sharalar bekitiletin bolady», - dedi mınıstrlik ókili.

Jobamen myna silteme boıynsha tanysa alasyz.