Qoǵamdyq qaýipsizdikti 40 myńǵa jýyq polıtseı qamtamasyz etýde

NUR-SULTAN. QazAqparat – Elimizde ótip jatqan saılaý barysynda qoǵamdyq tártipti 40 myńǵa jýyq polıtsııa qyzmetkeri qamtamasyz etýde. Bul týraly QR Іshki ister mınıstriniń orynbasary Arystanǵanı Zaparov aıtty, dep habarlaıdy QazAqparat tilshisi.

«Búgin elimiz úshin mańyzdy kún. Májilis jáne máslıhattar depýtattaryn saılaý naýqany ótip jatyr. Bul naýqandy ótkizýge jáne aldyn ala daıyndyq sharalaryn uıymdastyrýǵa baılanysty ishki ister organdarynyń barlyq jeke quramy qyzmet atqarýdyń kúsheıtilgen tártipte jumys jasaýda. Búginde elimizdegi quqyqtyq tártip pen qoǵamdyq qaýipsizdikti 40 myńǵa jýyq ishki ister organdarynyń qyzmetkeri qamtamasyz etýde», - dedi mınıstr orynbasary Ortalyq kommýnıkatsııalar qyzmetindegi brıfıng barysynda.

Onyń atap ótýinshe, oqıǵalarǵa, onyń ishinde daýys berý oryndarynda bolýy múmkin quqyq buzýshylyqtarǵa jedel den qoıý úshin qosymsha jedel tergeý toptaryn qurylǵan.

«Olardyń quramynda prokýratýra qyzmetkerleri de bar. Saılaý ýchaskelerindegi jaǵdaıǵa keler bolsaq, bıýlletender aparylmaı turyp, barlyq saılaý ýchaskeleri qaýipsizdik turǵysynan tekserýden ótti. Polıtsııa qyzmetkerleriniń baqylaýymen bıýlletenderdiń barlyǵy ýchaskelerge esh kedergisiz jetkizildi», - dedi Arystanǵanı Zaparov.