Qoǵamdyq baqylaý mehanızmi jańa ózgeristermen jetildi - Aıda Balaeva
«Memleket basshysy 2019 jylǵy Prezıdent saılaýynan keıin «qoǵamdyq kelisimniń jańa formaty qajet» dep aıtqanyn bilemiz. Ol úshin árıne eń aldymen tyń reformalar kerek ekeni túsinikti. Bul rette, Prezıdent halyqpen keri baılanysty kúsheıtýdi tapsyryp, «halyq únine qulaq asatyn memleket» tujyrymdamasyn jarııalady. Sonyń nátıjesinde, barlyq memlekettik organdar ınternettegi jumysy jandanyp, onlaın qoǵamdyq qabyldaýlar tetigi iske qosyldy, birinshi basshylar áleýmettik jeliler arqyly tikeleı baılanysqa shyǵa bastady.
Qoǵamdyq baqylaý mehanızmi jańa ózgeristermen jetildi. Onyń negizinde qoǵamdyq keń talqylaýdan ótken arnaıy zań jobasy ázirlenip Májilis qaraýyna engizildi. «Adamdar memleket úshin emes, memleket adamdar úshin» degen ustanym negizinde quramyna elge tanymal azamattar, maıtalman sarapshylar, qoǵam belsendileri, saıasattanýshylar engen – Ulttyq qoǵamdyq senim Keńesi quryldy.
Memleket basshysy buǵan deıin ashyq demokratııalyq qaǵıdalarǵa negizdelgen saıası reformalardyń 4 paketin usynǵan bolatyn. Atap aıtqanda, «Beıbit jınalystardy ótkizý tártibi týraly», «Saıası partııalar týraly», «Saılaý týraly», «Parlament jáne onyń depýtattarynyń mártebesi týraly», «Aqparatqa qol jetkizý týraly» Zańdar qabyldandy. Partııa qurý úshin qol jınaý shegi tómendetildi, Májilis pen máslıhattardaǵy áıelder men jastardyń úlesi kvotamen ósti. Parlamenttik oppozıtsııa ınstıtýty engizildi. Alǵash ret, aýyl ákimderin saılaý saıası naýqany sátti ótti. Bul reformany halyq jyly qabyldady, ózderiniń naqty tańdaýlaryn jasady. Kelesi kezekte – aýdan ákimderin saılaý mindeti tur», - dedi Aıda Balaeva.
Onyń aıtýynsha munyń barlyǵy da buryn qoǵam tarapynan jıi aıtylyp júrgen usynystar bolatyn.
«Memleket basshysynyń qoldaýynyń arqasynda olar naqty iske asyp jatyr. Prezıdent jarııalaǵan «estıtin memleket» tujyrymdamasy «naqty máselelerdi sheshý» qaǵıdasyna aýysyp jatyr. Prezıdent memlekettik basqarýdy jetildirý jumystary júıeli túrde jalǵasatyny birneshe ret aıtqan bolatyn. Memleket basshysynyń búgingi Joldaýynda jarııalanǵan jańashyldyqtar osynyń kezekti dáleli. Sonyń biri – Ulttyq qoǵamdyq senim Keńesiniń jumys aýqymyn keńeıtip Ulttyq Quryltaı deńgeıine kóterý. Halyq bolyp birigip, alqa quryp aqyl qosýdy bildiretin «quryltaı» uǵymy halqymyz úshin qashanda qasterli túsinik. Sonymen qatar, Úkimettiń Parlamenttiń aldyndaǵy esep berý tetigi kúsheıedi. Saıası partııa qurýdyń shekti mólsheri taǵy da qysqardy. Endigi jerde, partııa qurý úshin el aýmaǵynda 5000 qol jınasa jetkilikti. Májilis pen Máslıhat depýtattaryn partııalyq tizimmen qatar, majorıtarly júıemen saılaý júıesi engiziledi. Bul sóz joq, halyqtyń ózi saılaǵan depýtattary arqyly Parlament minberinen Úkimetke naqty máselelerin estirtý múmkindigin keńeıtip otyr. Prezıdentimiz aıtqandaı Qazaqstan saıası modernızatsııa kýrsyn júıeli túrde jalǵastyra beretin bolady. Osylaısha kezekti saıası reformalardyń sátti iske asýy qoǵamdy odan ary demokratııalandyrýǵa yqpal etedi. Eń bastysy «Jańa Qazaqstandy birge qurý» jolynda el bolyp birigip, qoǵam bolyp jumylyp uıymshyldyq tanyta bilý qajet», - dep tolyqtyrdy ol.