Qoǵamdyq baqylaý: Esik qalasyndaǵy bazarda karantın talaptary oryndalmaı jatyr
«Qoǵamdyq tamaqtaný men saýda oryndary, sulýlyq salondary, kólik jýatyn jáne qurylys satatyn jerlerdiń jumystarymen tanystyq. Erekshe atap ótkim keledi, biz tekserý júrgizgen barlyq sulýlyq salondary karantın talaptaryn qatań saqtap jumys isteýde. Kıim satatyn, kólik jýatyn jerlerde de tártip bar. Biraq Eńbekshiqazaq aýdanyndaǵy Esik qalasyndaǵy «Toǵjan» bazarynda karantın talaptary óreskel buzylýda», - dedi Qoǵamdyq baqylaý tobynyń Almaty oblysy boıynsha ókili Dılmıra Blats.
Onyń sózinshe, atalǵan bazarda 300- den artyq saýdager jumys isteýde. Halyq óte kóp.
«Halyq medıtsınalyq betperdesiz júr. Qoǵam araqashyqtyq jaıly múldem umytqan. Erteń indetti juqtyryp, aýyrsa kim jaýap beredi?! Sondyqtan men bul máseleni Eńbekshiqazaq aýdanynyń ákimine kirip, jetkizemin. Muny tıisti deńgeıde sheshpesek, halyqtyń densaýlyǵyna qaýip tónedi», - dedi D. Blats.
Sondaı-aq ol kóptegen saýda oryndarynda sanıtaızer, antıseptıktiń joqtyǵyn atap ótti. Ázirge tek eskertýmen ǵana shektelgen. Biraq, barlyq tekserý júrgizilgen nysandardy olar qadaǵalaýǵa alyp otyr.
Aıta ketken jón, qoǵamdyq baqylaý Aqparat jáne qoǵamdyq damý mınıstrliginiń bastamasymen elde koronavırýs ınfektsııasy sharyqtaý shegine jetip turǵan kezde qurylǵan bolatyn.