Qoǵamdaǵy máselelerdi sheshetin bolsaq, halyqtyń bılikke degen senimi artady - Nurtaı Sabılıanov

TÚRKІSTAN. QazAqparat – Ulttyq quryltaıdyń ekinshi otyrysyna qatysqan Májilis depýtaty Nurtaı Sabılıanov qoǵamdaǵy máselelerdi sheshýge baǵyttalǵan bıýdjet qarajaty tıimdi jumsalýy kerektigin jetkizdi, dep habarlaıdy QazAqparat tilshisi.

«Ulttyq quryltaıda kóptegen máseleler kóterildi. Eń basty qoǵamdaǵy másele – jemqorlyqty joıý. Egerde jemqorlyqty joıyp, qoǵamdaǵy máselelerdi sheshetin bolsaq, halyqtyń bılikke degen senimi óte joǵary bolady», - dedi depýtat.

Sondaı-aq, bıýdjet qarajatyn tıimdi paıdalanýǵa qatysty ózi de másele kótergendigin jetkizdi.

«Quryltaıda memleket tarapynan bólinip jatqan qarajattyń tıimdiligin arttyrý jaıynda másele kóterdim. Máselen, respýblıkalyq bıýdjetten, oblystyq bıýdjetten qarajat bólinedi. Aýdandarǵa, aýyldarǵa beriledi. Jobalar júzege asyp, nysandar salynady. Biraq onyń sapasyna, bıýdjet qarajatynyń tıimdi jumsalýyna kóp kóńil bóline bermeıdi. Osy jaǵyna kelgende halyq talap qoıyp otyr. «Nege bizdiń aýylda sý joq?», «Nege bizde jol durys emes?», «Nege sapasyz jol salynyp jatyr?» dep. Osy baǵytta da biz naqty sheshimder qabyldaýymyz qajet», - dedi Májilis depýtaty.