Qoǵamda senimsizdik týyndaǵan jaǵdaıda jerdi jekemenshikke berý máselesin túbegeıli sheshý óte qıyn – Aıdos Sarym
«Aýyl sharýashylyǵynda, jer máselesinde qordalanǵan, buǵan deıingi Jer komıssııasynan tys qalyp, sheshimin tappaǵan máselelerge qatysty naqty ustanymdar qabyldanyp jatyr. Biz, Parlament retinde úlken zańdar legin, atap aıtqanda, Jer kodeksi men aýyl sharýashylyǵyna qatysty zańdarǵa ózgeristerdi kútip otyrmyz. Onyń ishinde, búgingi, buǵan deıingi 4-otyrysta, odan tys jumys toptarynda aıtylǵan derekterdi alyp, Qudaı qalasa zańdyq nemese tıisti normatıvtik-quqyqtyq sheshimge aınaldyrý isimen aınalysý kerek bolady. Munyń ishinde eń bastysy qoǵamdy ábigerge salǵan, másele týdyrǵan jerdi jekemenshikke berý jaıyna qatysty aıtar bolsaq, búgingi kúni tolyq aqparat joq, jer qyrtysy egjeı-tegjeıli zerdelenbegen, qoǵam ishinde senimsizdik týyndaǵan jaǵdaıda bul máseleni túbegeıli sheshý qıyn dep esepteımin», - dedi Aıdos Sarym atalǵan komıssııanyń 5-otyrysynan keıin.
Onyń atap ótýinshe, sheshim qabyldaýshy Úkimet, Parlament deıtin bolsaq, onda búgingi kúni syrttan kórsetilip jatqan qysymdy sanaǵa emes, kóńil-kúıge baǵynǵan áreket dep baǵalaýǵa bolady.
«Sondyqtan ár tarapqa da sheshim qabyldaý úshin naqty, shynaıy aqparat qajet. Senimsizdikti joıýdyń bir ǵana joly – fakt. Shyn máninde bir-eki jyldyń ishinde jer kadastry ashylsa, qaı jerdiń ıesi kim ekeni kórsetilse, aldaǵy ýaqytta jaıylymdar qaıtarylsa, pandemııadan keıin ekonomıkamyz kóterilip, áleýmettik máseleler sheshilip, halyqtyń eńsesi kóterilip jatsa, onda sol kezde jekemenshik máselesin kóterýge bolady. Sondyqtan jerdi jekemenshikke berýge qatysty moratorııdi 5 jylǵa sozý týraly máseleni Prezıdentke usyný qajet. Bul - Prezıdent qabyldaıtyn úlken sheshim», - dedi Májilis depýtaty.
Eske sala keteıik, búgin Jer reformasy komıssııasynyń otyrysynda jer ıelgine qatysty normalarǵa belgilengen moratorıı merzimin 5 jylǵa uzartý týraly sheshim qabyldandy.