Qoǵam men bılik arasyndaǵy ashyq dıalogtyń qajettiligi arta tústi - mınıstr

NUR-SULTAN. QazAqparat - Aqparat jáne qoǵamdyq damý mınıstri Dáýren Abaev Prezıdent Qasym-Jomart Toqaevtyń alǵashqy jumys saparyn nelikten Túrkistan oblysynan bastaǵanyn túsindirdi, dep habarlaıdy QazAqparat tilshisi.

«Shymkent qalasymen birge qosqanda Túrkistan oblysy - Qazaqstandaǵy halyq eń kóp turatyn, halyqtyń tyǵyzdyǵy óte joǵary, ásirese ınvestıtsııa tartý jaǵynan damý keleshegi orasan zor aımaq sanalady. Túrkistan bizdiń eldiń turǵyndary úshin ǵana emes, búkil túrki álemi úshin kıeli meken ekenin umytpaıyq. Bul rette Qasym-Jomart Kemeluly halyqpen kezdesý kezinde jergilikti deńgeıdegi sharýalarmen birge jalpy eldiń deńgeıindegi jumystar týraly sóz qozǵady. Máselen, memleket pen halyqtyń qarym-qatynasynyń qaǵıdattaryn qaıta qaraý mindeti tapsyryldy. Búgingi tańda bılik pen qoǵamnyń arasyndaǵy ashyq ári túsinikti dıalogtyń aıqyn qajettiligi aıtarlyqtaı arta tústi. Áleýmettik suranystyń qajettilikterin dástúrli amal-ádister qanaǵattandyra alatyn emes», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.

Mınıstrdiń aıtýyna qaraǵanda, osy sebepti atalǵan qarym-qatynastyń jańa formattary engizilýi ábden yqtımal.

«Prezıdent sonymen birge jemqorlyqpen kúres máselesine, eldiń ekonomıkalyq damýy men ótkir áleýmettik máselelerdi sheshýge jeke toqtalǵanyn atap ótkim keledi», - dedi ol.

Eske sala ketsek, osydan birneshe kún buryn Qazaqstan Respýblıkasynyń Prezıdenti Qasym-Jomart Toqaev Túrkistan oblysynyń atqarýshy organ basshylarymen, ardagerler jáne zııaly qaýym ókilderimen kezdesti. Prezıdent alǵashqy saparyn nelikten Túrkistannan bastaǵanyn túsindirgen edi.

Sonymen birge, Qasym-Jomart Toqaev atalmysh sapar kezinde ońtústik jurtshylyǵyna josparlaryn aıtyp berdi.