Qoǵam memqyzmetshiniń boıynan biliktilik pen adaldyqty kórgisi keledi - Jazyqbaev
«Qoǵam memlekettik qyzmetshilerden olardyń biliktiligimen qatar ádeptiligin, ashyqtyǵyn, adaldyǵyn, adamgershilik qasıetin jáne joǵary mádenıettiligin talap etedi», - dedi keńes barysynda agenttik tóraǵasy Darhan Jazyqbaev.
Ol Memleket basshysy Qasym-Jomart Toqaev 2022 jylǵy qańtarda Parlament Májilisiniń otyrysynda, keıin sybaılas jemqorlyqqa qarsy is-qımyl máseleleri jónindegi májiliste sóılegen sózinde memlekettik qyzmet júıesin is júzinde servıstik jáne klıentke baǵdarlanǵan bolýy úshin qaıta jańǵyrtý qajettigin atap ótkenin eske saldy. Sonymen qatar agenttik tóraǵasy memlekettik qyzmet júıesindegi jańa syn-tegeýrinderdi sheshý jańa redaktsııadaǵy Ádep kodeksin qabyldaýǵa sebep bolǵanyna nazar aýdardy. Kodekste adal nıettilik, ádilettilik, ashyqtyq, sypaıylyq jáne klıentke baǵdarlaný ispetti memlekettik qyzmettiń qaǵıdattary aıqyndalǵan.
«Bul rette «klıentke baǵdarlanǵan» memlekettik apparatty qalyptastyrý jáne memlekettik qyzmetterdi kórsetýde ashyqtyq qaǵıdattaryn saqtaý boıynsha basym talaptar qarastyrylǵan», – dedi agenttik tóraǵasy.
Agenttik baspasóz qyzmetiniń málimetinshe, jıynda Ádep jónindegi keńesterdiń jumys qorytyndysy shyǵaryldy. Keńesterdiń 82 otyrysy ótkizilip, onda barlyǵy 542 másele qaraldy. Ádep jónindegi keńesterdiń qyzmeti kóbinese etıkalyq normalardy buzýdyń aldyn alýǵa jáne memlekettik qyzmetshilerdiń zańdy múddelerin qorǵaýǵa baǵyttalǵan. Osy jumystyń arqasynda ádep normalaryn buzǵany úshin jazalanǵan adamdardyń sany jyl saıyn azaıyp keledi. Atap aıtqanda, sońǵy eki jylda olardyń sany 2 esege kemigen.
«Ádep jónindegi keńester 2 393 usynym engizip, onyń 96 paıyzy oryndaldy. Júrgizilgen jumys nátıjesinde 1 323 azamattyń quqyǵy qalpyna keltirildi. Ádep jónindegi keńesterdiń usynymdary negizinde 32 memlekettik qyzmetshige qoldanylǵan tártiptik jazalardyń kúshi joıylyp, 63 tártiptik is toqtatyldy. Jumys ýaqytyn júıeli túrde buzýǵa jol bermeý jónindegi jumys nátıjesinde 1 047 qyzmetshige qosymsha demalys saǵattary berildi. Ústeme jumysqa zańsyz tartylǵan qyzmetkerlerge 38 mln teńgeden astam aqshalaı ótemaqy tólendi», - dep atap ótedi agenttikten.