Qoǵam qaıratkerleri men belsendiler halyqty birlikke shaqyrdy

NUR-SULTAN. QazAqparat - Qoǵam qaıratkerleri, belsendiler men elorda turǵyndary qazaqstandyqtardy birigýge, tynyshtyq saqtaýǵa jáne eldegi beıbitshilik pen turaqtylyqty saqtaý úshin jumylýǵa shaqyrdy, dep habarlaıdy QazAqparat qala ákimdiginiń resmı saıtyna silteme jasap.

«Qazaqstandyq salaaralyq yntymaqtastyq qaýymdastyǵy» zańdy tulǵalar birlestiginiń dırektory Bolat Omarov koronavırýs pandemııasy kezinde memleket shaǵyn bıznes nysandaryn qalaı qoldaǵanyn eske saldy.

«Qazir qıraǵan ǵımarat kóp. Nesıe alǵan, jumys oryndaryn qurǵan adamdardyń múlki tonalyp, qırady. Bul jaǵdaı meni qatty alańdatady. Osy qıyn-qystaý kúnde bárimiz birigip, Prezıdentimizdiń aınalasyna jınalyp, ony qoldaǵandaryńyzdy qalaımyn. Bizdiń kúshimiz – birlikte jáne Memleket basshysyn qoldaýda», - dep atap ótti Bolat Omarov.

«Tarıhı Atajurt» qoǵamdyq birlestiginiń tóraǵasy Ózbek Qurmanbaıuly da qazaqstandyqtardy úreı men arandatýshylyqqa boı aldyrmaýǵa shaqyrdy.

«Qazaq – dana halyq. Men bárińizdi tynyshtyqqa shaqyramyn, arandatýlarǵa jaýap bermeńiz», - dedi ol.

«Biz jyldar boıy ózimiz salǵan dúnıeni qurtýǵa jol bermeýimiz kerek. Búgin bizdiń mektep-gımnazııa áskerılerdi, soldattardy jáne polıtseılerdi qoldaý maqsatynda olarǵa óz qolymen ystyq tamaq daıyndady. Osylaısha táýlik boıy qaýipsizdikti qamtamasyz etip júrgenderdiń barlyǵyn qoldaýǵa sheshim qabyldadyq. Biz árqashan birgemiz», - dedi №80 mektep-gımnazııasynyń dırektory Gúlmıra Jarmınova.
Qazaqstan halqy Assambleıasynyń ókilderi de el azamattaryn birigýge shaqyrady.

«Men búkil Qazaqstanǵa, barlyq azamattarǵa, otandastarymyzǵa birge bolýdy, birlikte bolýdy tileımin, sonda biz kez kelgen qıyndyqty eńseremiz. Eń bastysy – ashyq aspan men kelisim», - dedi «Tań» mádenı ortalyǵy jastar qanatynyń tóraǵasy Ravıl Valıev.