Qoǵam qaıratkeri jerge qatysty baqylaý qyzmetin kúsheıtýdi usyndy

NUR-SULTAN. QazAqparat – Jer boıynsha qosalqy jalgerlikke jol berilmeýi kerek. Bul týraly Jer reformasy jónindegi komıssııanyń birinshi otyrysynda qoǵam qaıratkeri Muhtar Taıjan aıtty, dep habarlaıdy QazAqparat tilshisi.

«Kelesi másele – ol sýbarenda. Qosalqy jalgerlikke jol berilmeýi kerek, ıaǵnı ol latıfýndısterdiń negizi. Sýbarendaǵa jol berilse, onda jergilikti halyq eshqashan sol jerge qol jetkize almaıdy», - dedi M. Taıjan.

Sonymen qatar ol jer komıtetiniń (QR AShM Jer resýrstaryn basqarý komıteti) kúshi álsiz ekenin, óıtkeni jergilikti jer ınspektorlary ákimderge qaraıtynyn aıtty. Ákimder bir qolmen jerdi bóledi de, ekinshiden, ony ózi baqylap otyrady.

Qoǵam qaıratkeriniń aıtýynsha, jer ınspektorlary, ıaǵnı baqylaý fýnktsııalary tıisti qurylymnyń qaramaǵynda bolýy kerek. Bul qurylymdy Aýyl sharýashylyǵy mınıstrliginen shyǵaryp, tikeleı Prezıdentke baǵyndyrǵan durys bolady.

«Sonda ǵana elimizdegi jer alqaptary boıynsha tártip ornatylady dep úmittenemin», - dedi Muhtar Taıjan.