Qoǵam qaýipsizdigi boıynsha óńirler reıtıngi jasalmaq

ASTANA. QazAqparat – Búgingi qoǵamnyń qanshalyqty qaýipsiz ekenindiginiń jaı-kúıin anyqtaıtyn ulttyq baıandama daıyndalady. Bul týraly Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Іshki ister mınıstrligi qoǵamdyq qaýipsizdiktiń jaı-kúıi týraly ulttyq baıandama daıyndaıdy. Ulttyq baıandama qaýipsizdikti qoǵammen birge seriktestikte qamtamasyz etý tujyrymdamasy jobasy aıasynda usynylady. Ony táýelsiz sarapshylardyń baǵasy súıemeldeıdi. Ulttyq baıandama ýákiletti organdardyń qaýipsizdikti qamtamasyz etý salasyndaǵy jumysyn jandandyrýǵa múmkindik beredi dep boljanýda. Ony ázirleý vedomstvoda memlekettik organdarmen jáne azamattyq sektor ókilderimen kezdesý kezinde qabyldandy», - dedi Shuǵyla Turlybek ІІM-de ótken brıfıngide.

Onyń aıtýynsha, qaýipsizdik deńgeıi boıynsha óńirler reıtıngin jasaý týraly usynystar tústi.

«Kezdesýge qatysýshylar jergilikti qoǵamdastyqtarmen áriptestiktiń jańa júıesin qurý jáne profılaktıkanyń árbir sýbektisiniń ortaq jaýapkershiligin belgileý boıynsha jobaǵa engizilgen sharalardy oń qabyldady. Qoǵamdyq tártipti buzatyn jáne azamattardyń qaýipsizdigine qaýip tóndiretn túrli jaıttar talqylandy», - deıdi ol.

Sondaı-aq, mınıstrlik ókili tujyrymdama sheńberinde qoǵamdyq tártip pen azamattardyń qaýipsizdigin qamtamasyz etý úshin úkimettik emes uıymdar jáne eriktilermen áriptestikti damytý qarastyrylatynyn aıtty.