Bıshimbaev isi, Almatydaǵy avtobýs apaty —Qoǵamnyń ashý-yzasyn týdyrǵan keleńsiz oqıǵalar
Bıshimbaev isi
Aıtalyq, sybaılas jemqorlyq qylmysy úshin 10 jylǵa bas bostandyǵynan aıyrylyp, temir tordyń ar jaǵynan merziminen buryn bosaǵan Qýandyq Bıshimbaev jubaıy Saltanat Núkenovany soqqyǵa jyǵyp óltirip, qaıtadan túrmege toǵytyldy. Qaıǵyly jaıt 9 qarasha kúni Baý meıramhanasynda oryn alǵan. Bul oqıǵa Memleket basshysy Qasym-Jomart Toqaev aıryqsha nazar aýdaryp, Іshki ister mınıstrligine atalǵan isti erekshe baqylaýǵa alýdy tapsyrǵan bolatyn.
«Zań bárine birdeı. Azamattarymyz zańdylyqty nyǵaıtý jolynda judyryqtaı jumylsa ǵana qoǵamda ádildik ornaıdy. Ádiletti Qazaqstan – Zań men Tártip ústemdik quratyn el», – degen edi Prezıdent.
11 qarashada Astana qalasynyń mamandandyrylǵan aýdanaralyq tergeý soty kúdikti Qýandyq Bıshimbaevqa qatysty 2 aı merzimge qamaýǵa alý túrindegi bultartpaý sharasyn sanktsııalady. Al Saltanat Núkenovanyń máıitine 12 saraptama taǵaıyndaldy. Onyń 11-iniń qorytyndysy shyǵarylyp, ishki ister mınıstrligine berilgen. Biraq, elimizdiń Qylmystyq-protsestik kodeksiniń 201-babyna sáıkes saraptama qorytyndysy jáne osy iske qatysty derekter jarııa etýge jatpaıdy.
«Qýandyq Bıshimbaevtiń isine qatysty aıtar bolsaq, Saltanat Núkenovanyń máıitine saraptama jasaý týraly qylmystyq is aıasynda materıal kelip túskeni ras. Onyń qalaı qaıtys bolǵanyna qatysty mán-jaıdy aıta almaımyz. Qylmystyq is aıasynda 12 túrli saraptama taǵaıyndaldy. Onyń onynyń qorytyndysy shyǵarylyp, quzyrly organdarǵa jiberildi. Bireýi osy aptada aıaqtalady. Al 12-shi saraptama kúni keshe ǵana kelip tústi. Zańnamada bekitilgen tártipke sáıkes, otyz kúntizbelik kúnde saraptama ótkizilýi tıis. Saraptama qorytyndylary Іshki ister mınıstrligine joldanady», - degen edi taıaýda Ádilet mınıstrliginiń resmı ókili Talǵat Ýálı.
Bas prokýrordyń orynbasary Jandos Ómirálıevtiń aıtýynsha, Qýandyq Bıshimbaevqa asqan qatygezdikpen kisi óltirdi degen aıyp taǵylyp otyr.
«Bıshimbaevtiń ústinen asqan qatygezdikpen kisi óltirý baby boıynsha qylmystyq is qozǵalǵanyn bilesizder. Sondaı-aq ol ustalǵan bolatyn jáne onyń týysqany atalǵan qylmysty búrkemelep polıtsııaǵa habarlamaǵany úshin ızolıatorǵa alyndy», – dedi quzyrly organ ókili.
Taıaýda Youtube jelisindegi «Ertisbaev Live» arnasyna suhbat bergen Qýandyq Bıshimbaevtyń ákesi Ýálıhan Bıshimbaev ulynyń qasaqana adam óltirý nıeti bolmaǵanyn aıtty.
«Ata-ana retinde ulymyzda Saltanatty (Núkenova – red.) óltirý pıǵyly bolmaǵanyna senemiz. Ol onymen otbasyn qurǵysy keldi, ekeýi de birge ómir súrýdi josparlady, Saltanatqa garderobty keńeıtý úshin úıinde jóndeý jumystary júrip jatty. Ekeýi de bala súıip, tolyqqandy otbasyn qurýdy qalady. 9 qarasha kúni ne bolǵanyn ózimiz de bilmeımiz. Biraq ulymyzdyń qasaqana adam óltirý pıǵyly bolmaǵanyn taǵy da atap ótkim keledi», - dedi Ý. Bıshimbaev.
Avtobýs apaty
22 jeltoqsanda Almatyda avtobýs bir top adamdy qaqty. Polıtsııanyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan ol esinen tanyp, kólikti basqara almaı qalǵan. Apat saldarynan 7 adam zardap shekti. Jedel medıtsınalyq qyzmet kelgenshe úsheýi qaıtys boldy. Kúdiktige qatysty 2 aı merzimge qamaýda ustaý túrindegi bultartpaý sharasy qoldanyldy.
Oqıǵa saldarynan qaza tapqan úsh adamnyń ekeýi erli-zaıypty ustazdar edi. Olar Almaty oblysy Qarasaı aýdanyna qarasty Kóksaı aýylyndaǵy M.Mámetova atyndaǵy orta mektepte jumys istegen. Otaǵasy Talap Qosymov mektep dırektorynyń sharýashylyq isi jónindegi orynbasary bolsa, jary Gúljahan Yrysymbetova qazaq tili men ádebıeti páninen dáris bergen. Apat bolǵan kúni ekeýi jumystan birge shyǵyp, balalaryna asyǵyp, Qalqaman aıaldamasy arqyly úılerine qaıtpaq bolǵan.
Qamqorshydan alaıaqtyqqa deıin bir qadam
Zorlyq-zombylyq qurbandarynyń qamqorshysy retinde qoǵamǵa esimi tanymal bolǵan «NeMolchıKZ» qorynyń basshysy Dınara Smaıylovanyń bylyqtary áshkere boldy. Búginde Almaty qalasynyń, Shyǵys Qazaqstan jáne Almaty oblystarynyń polıtsııa departamentteri Dına Tańsári retinde tanymal bolǵan oǵan qatysty kórineý jalǵan aqparat taratý, jeke ómirge qol suǵylmaýshylyqty buzý faktileri boıynsha alty qylmystyq is qozǵap, tergep jatyr. Onyń ishinde eki is — alaıaqtyq boıynsha.
«Sotqa deıingi tergeý barysynda Smaıylovanyń «NeMolchıKZ» qorynyń basshysy ekeni, sonymen qatar ózin qoǵam belsendisi, quqyq qorǵaýshy jáne áıelder men balalarǵa qatysty zorlyq-zombylyqpen kúresýshi retinde kórsetetindigi anyqtaldy. Ol óz qyzmetin áleýmettik jelilerde keńinen jarııalaıdy. Alaıda Smaıylovanyń kóptegen jarııalanymdary shyndyqqa janaspaıdy, sebebi olar tergeýmen rastalmaǵan. Onyń jalǵan habarlarymen quqyǵy buzylǵan azamattar shaǵym túsirdi. Tergeý men júrgizilgen sot saraptamalary kórsetkendeı, «NeMolchıKZ» qorynyń basshysy tek óziniń sýbektıvti pikirine súıene otyryp, aıyptaý basylymdaryn jazǵan. Smaıylova jalǵan aqparat taratýmen qatar 2021 jyldan bastap, ózi Qazaqstan Respýblıkasynan tys jerde bola tura, óziniń áleýmettik jelilerdegi paraqshalarynda zorlyq-zombylyq qurbandaryna kómek kórsetý úshin qarajat jınaıtynyn jarııalaǵan. Máselen, Shyǵys Qazaqstan oblysynyń polıtsııa departamenti tergep jatqan alaıaqtyq aıasynda sáýir aıynda Smaıylova Óskemen qalasynda kámeletke tolmaǵan qyzdyń ózine qol jumsaǵany týraly jalǵan málimet jarııalaǵany anyqtaldy. Sodan keıin ol qaza bolǵan adamnyń otbasyna kóńil aıtyp, bul jaǵdaıdy joqqa shyǵarǵan polıtsııaǵa senbeı, óz-ózine qol jumsaý áreketiniń bolǵanyn jáne qyzdyń aýrýhanada jatqanyn málimdegen. Alaıda bul jarııalanymdardyń bári jalǵan bolyp shyqty, óıtkeni is júzinde sýıtsıd bolǵan joq. Atalmysh kámeletke tolmaǵan qyz zardap shekken buzaqylyq faktisi boıynsha qylmystyq is sotqa jiberildi. Osyǵan qaramastan Smaıylova jábirlenýshiniń advokatyna aqsha jınaıtynyn jarııalap, sot protsesi kezinde 20 mln teńgeden astam qarajat jınaǵan. Onyń az ǵana bóligin issapar shyǵyndaryna tólegen. Alaıda sotta advokattyń qyzmetin jábirlenýshi taraptyń ózi tólegeni belgili boldy, bul sottalýshylardyń qorǵaýshylarynyń narazylyǵyn týdyrdy», — deıdi ІІM tergeý departamenti bastyǵynyń orynbasary Samat Aısov.
Alaıaqtyq boıynsha taǵy bir qylmystyq isti Almaty oblysynyń polıtsııa departamenti kámeletke tolmaǵan zorlyq-zombylyq qurbanyna kómek kórsetý úshin aqsha jınaý faktisi boıynsha qozǵady.
«Bul jaǵdaıda Smaıylova bir otbasyndaǵy zorlyq-zombylyq týraly jalǵan habarlama jarııalap, oqyrmandarynan aqsha aýdarýdy surap, jubaıynyń Kaspi kartasynyń rekvızıtterin kórsetken. Tergeý barysynda zorlyq-zombylyq faktisi rastalmady. Biraq bank málimetterine sáıkes kórsetilgen ýaqyt ishinde Smaıylova taǵy da birneshe mıllıon teńge jınap úlgergen. Sonymen qatar sottyń sanktsııasymen alynǵan bank málimetterin taldaý barysynda Smaıylova Kommertsııalyq emes uıymdar týraly zańnyń talaptaryn buza otyryp, ózi shetelde bola turyp, aýdarymnan túsken aqshany jubaıynyń jeke kartochkasyna alǵany, sondaı-aq aqshany óz qajetine jumsaǵany anyqtaldy. Alynǵan dáleldemelerdi eskere otyryp, tergeý organy Smaıylovanyń is-áreketin Qylmystyq kodekstiń 190-babynyń 3-bóligi boıynsha saralap, 27 jeltoqsanda oǵan izdeý jarııalandy. Sotqa deıingi tergeý jalǵasyp jatyr», — dedi Samat Aısov.
Áke abyroıyn tókkender
Qoǵam nazaryn aýdarǵan kelesi oqıǵa Májilis depýtaty Dáýlet Turlyhanovtyń uldaryna qatysty oryn aldy. Este bolsa, qyrkúıek aıynda áleýmettik jelide jigit pen qyzdyń arasyndaǵy janjalǵa baılanysty vıdeo tarady. Vıdeo avtory bul oqıǵa Májilis depýtaty Dáýlet Turlyhanovtyń ortanshy ulyna qatysty ekenin aıtady. Osy oraıda tilshiler oqıǵaǵa qatysty depýtattyń pikirin suraǵan bolatyn.
«Jastar ózderi sheshedi. Bir-birin jaqsy kóretin bolar», - degen edi sol kezde D.Turlyhanov.
Sál keıinirek ol Facebook paraqshasynda ulynyń qyz balany soqqyǵa jyqqany beınelengen vıdeoǵa qatysty pikir bildirdi.
«Búgingi áleýmettik jelilerde meniń ulyma qatysty taraǵan vıdeo boıynsha túsinik berýdi jón kórdim. Ózderińiz biletindeı, meniń áýletim aınalasyndaǵy mundaı oqıǵalar birinshi ret emes. Osyndaı oqıǵalardyń zańdylyqpen qaıtalanýy meniń kóńilime eriksiz oı salady. Men óz tarapymnan balalaryma tolyqtaı ákelik, qazaqy tárbıe berdim. Búgingi vıdeoǵa qatysty meniń de qoıatyn bir suraǵym bar. Tańǵy saǵat 4-te mundaı qyzdar ulym turatyn úıge kelip, nege ondaı oqıǵaǵa bastaý bolatyny túsiniksiz. Jáne bul jaǵdaı aıaq astynan kameralarǵa túsip qalyp, belgili bir adamdarǵa paıdaly qıyndylarynyń aqparat quraldaryna taraýy, meniń ǵana emes, kez kelgen adamnyń kóńiline kúmán keltiredi», - dep jazdy Dáýlet Turlyhanov.
Májilismenniń ekinshi ulyna keler bolsaq, bıyl aqpanda Nurasyl Bolat Almatyda zańger Anna Dmıtrıevıch pen onyń kúıeýi Oleg Chernovty soqqyǵa jyqqan edi. Qazan aıynda Almaty qalalyq áskerı sotynyń úkimimen Nurasyl Bolat QK 107-babynyń 2-bóligi 1 jáne 5-tarmaqtarynda kózdelgen qylmys jasaǵany úshin kináli dep tanylyp, oǵan jaza túrinde 1 mln 700 myń teńge aıyppul taǵaıyndady.
Nurasyl Bolattyń keleńsiz qylyǵy bul ǵana emes. 2 shildede áskerı bólimniń qatardaǵy jaýyngeri N.Bolat Almaty garnızony gaýptvahtasynan shyqqannan keıin komandırdiń buıryǵyna sáıkes óziniń áskerı bólimine barýǵa mindetti bolǵan. Alaıda ol bólimshe komandıriniń leıtenant A. bergen buıryǵyn oryndaýdan ashyq túrde bas tartyp, Áskerı polıtsııa basqarmasynyń ǵımaratyna kelgen avtokólikpen belgisiz baǵytta ketip qalǵan. Osydan keıin is Almaty qalasynyń Ákimshilik quqyq buzýshylyq ister jónindegi mamandandyrylǵan aýdanaralyq sotynda qaralyp, kinálini 15 táýlikke qamaýǵa alý týraly sheshim shyǵarǵany este.
«Sot B.-ny Ákimshilik quqyq buzýshylyq týraly kodekstiń 652-baby 6-bóliginde kózdelgen ákimshilik quqyq buzýshylyqty jasaǵany úshin kináli dep tanydy. Ol 15 táýlikke qamaýǵa alyndy», - dep habarlaǵan bolatyn sottan.