«Kogalymavıa» áýe kompanııasynyń ushaǵy apatynan Qazaqstan týmasy ajal qushty

ASTANA. QazAqparat - 31 qazanda Sınaı túbeginde bolǵan «Kogalymavıa» reseılik áýe kompanııasyna tıesili ushaq apaty Brıansk qalasynyń 46 jastaǵy turǵyny Elena Tomınanyń ómirin qıdy, dep habarlaıdy «Komsomolskaıa pravda».

Ol atalmysh reıstegi basqa jolaýshylar sııaqty, shıpajaıdaǵy demalysynan soń úıine oralyp kele jatqan.

Elena Tomına Qazaqstanda týǵan, keıinnen Brıansk qalasyna qonys aýdarǵan. Shamamen bes jyl buryn ol Brıanskiden Túmen qalasyna, al odan soń Sankt-Peterborǵa kóship barǵan, bul qalada onyń qyzy oqyǵan. Elena Mysyrǵa demalýǵa qyzymen birge barýdy josparlaǵan, alaıda qyzy oqýdan bosaı almaǵan. Lenıngrad oblysynda Elena Tomına SOS balalar aýylynda turyp, eńbek etken, jetim balalardy baýyryna basqan.

Múrdesin tanyǵan soń Elenany týystary Qorǵan oblysyna aparyp jerlemek.

Eske salaıyq, Sharm-esh-Sheıhtan Sankt-Peterborǵa ushqan «Kogalymavıa» áýe kompanııasynyń Airbus A321 áýe kemesi senbi kúni Mysyrda apatqa ushyrady. Onyń bortynda bolǵan 224 adam qaza tapty. Arasynda 17 bala men 200 eresek adam bolǵan jolaýshylar Mysyrdaǵy demalystan oralyp kele jatqan Brisco týroperatorynyń týrısteri bolǵan.

Ajal qushqandar negizinen Sankt-Peterbor qalasynyń, Lenıngrad, Novgorod, Tambov, Pskov oblastarynyń, sondaı-aq Belarýs jáne Ýkraına elderiniń azamattary bolǵan.