Kógaldandyrýǵa 5 mlrd teńge: Astanada barlyq aǵash-buta nómirlenedi

ASTANA. QazAqparat – Elordada jasyl jelekterdi túgendeý jumysy júrip jatyr. Ár aǵashqa nomer berilip, olar ınteraktıvti kartaǵa engizilimek. Bul týraly Astana qalasynyń Qorshaǵan ortany qorǵaý jáne tabıǵatty paıdalaný basqarmasynyń basshysy Álııa Qojabaeva málim etti, dep habarlaıdy QazAqparat tilshisi.

Atalǵan basqarma basshysynyń málimetinshe, bıyl elordany kógaldandyrý men abattandyrýǵa 5 mlrd teńge bólingen. Atalǵan qarjyǵa qaladaǵy 13 skverdi jáne bir qoǵamdyq keńistikti kógaldandyrý kózdelgen.

Sondaı-aq onyń aıtýynsha elorda irgesindegi «jasyl beldeýdi» abattandyrýǵa 1 mlrd teńge jumsaldy.

«Jasyl jelekterdi tsıfrlandyrý baǵdarlamasy aıasynda barlyq aǵash, butalar, kógaldar men gúlzarlardy derekqorǵa engizip, túgendeý júrgizildi. Bul jumys qazan aıynyń sońynda aıaqtalady. Bolashaqta arnaıy mobıldik qosymshanyń kómegimen ınteraktıvti kartadan ár tsıfrlanǵan aǵashtyń ornalasqan jerin, túrin, jasyn, túgendeý nómirin, jaýapty ıesin jáne basqa derekterdi kórýge bolady», - dedi Á. Qojabaeva qala máslıhatynyń turaqty komıssııa otyrysynda.

Odan bólek, máslıhat otyrysynda qalany abattandyrý jumysynyń barysy qaraldy.

«Búginde bizdiń basqarma eki jobany iske asyryp jatyr. Birinshi joba - «Myńjyldyq alleıasynda» býlvarlar men skverler salý. Ekinshi - Kereı-Jánibek jáne 19-S kóshesiniń boıynda jaǵalaý salý. Myńjyldyq alleıasynda býlvarlar men skverler salý halyqtyń jappaı demalýyna arnalǵan jáne qalanyń ekologııalyq jaǵdaıyn jaqsartýǵa baǵyttalǵan joba retinde ázirlendi. Búgingi tańda bas alleıanyń qurylysy aıaqtaldy. Qazir soltústik jáne ońtústik alleıa boıynsha jumystar júrgizilýde», - dedi Astana qalasynyń Otyn-energetıkalyq kesheni jáne kommýnaldyq-sharýashylyq basqarmasynyń basshysy Marsel Uzaqov.