Kofege qumar jandar neni eskerýi tıis - dáriger keńesi

<p>ALMATY. KAZINFORM - Kofe &mdash; álemdegi eń tanymal sýsyndardyń biri. Onyń ústine kóptegen adam óz ómirin tańǵy hosh ıisti kofesiz elestete de almaıdy. Bul rette Almaty qalalyq №36 emhananyń dárigeri Jansaıa Eskermes kofe ishýdiń paıdasy men zııanyn, sondaı-aq nazar aýdaratyn jaıttardy aıtyp berdi.</p>

Dáriger aldymen kofeniń adam aǵzasy úshin paıdaly tustary jaıynda aıtty.

"Kofeniń quramynda adamnyń sergek bolýyna kómektesetin jáne qýat deńgeıin arttyratyn kofeın bar. Ol adamǵa tańǵy ýaqytta nemese fızıkalyq ne psıhıkalyq belsendiligi artqan kezde paıdaly bolýy múmkin. Sondaı-aq, kofede antıoksıdanttyń kóp mólsheri bar, olar jasýshalardy bos radıkal áserinen zaqymdanýdan qorǵaýǵa kómektesedi. Kofeniń keıbir aýrýlarǵa oń áseri bar, mysaly, keıbir zertteýler boıynsha kofe ishý Parkınson aýrýy, 2-tıpti qant dıabeti, tipti keıbir qaterli isik túriniń damý qaýpin azaıtýy múmkin", - deıdi dáriger.

Onyń aıtýynsha, kofeniń kelesideı zııandy tustary bolýy múmkin.

"Kofeni shamadan tys tutyný uıqysyzdyqty, júıkeniń qozýy men alańdaýshylyqty týdyrýy múmkin. Qan qysymy joǵary adamnyń kofe ishýi qan qysymynyń odan ári kóterilýine sebep bolýy múmkin. Júkti áıelderge júktilik kezinde kofeni kóp mólsherde ishý qursaqtaǵy náresteniń shala týý qaýpi týýy múmkin.

Sondaı-aq, kofeındi shamadan tys tutyný mazasyzdyq, júrek problemalary, as qorytý buzylystary jáne t.b. máselelerge ákelýi múmkin", - dep atap ótti Jansaıa Eskermes.

Júrek-qan tamyrlary aýrýy bar adamdar, júkti áıelder, uıqysyzdyq nemese mazasyzdyqpen aýyratyn adamdar, balalar kofe ishýdi shektep nemese múldem bas tartqany jón.

Kofe ishýge eń qolaıly ýaqyt - tańerteń nemese kúnniń alǵashqy jartysy. Túnde kofeni ishý uıqyǵa kedergi keltirýi múmkin.

Sóz sońynda Jansaıa Eskermes kofe áýesqoılary úshin birqatar keńes berdi.

"Kúnine 400 mg-nan artyq kofeın tutynbańyz, ol shamamen 4 kese. Kofe uıqysyzdyqty, júıkeniń qozýyn nemese basqa jaǵymsyz belgilerdi týdyratynyn baıqasańyz, tutynýdy shekteýge tyrysyńyz nemese odan tolyǵymen bas tartyńyz. Adamdarǵa kofeın ár túrli áser etedi, sondyqtan óz sezimińizdi baqylańyz jáne soǵan baılanysty ishetin kofe mólsherin retteńiz. Jalpy aıtqanda, kofeın mólsheri men ár adamnyń jeke ereksheligine baılanysty kofe aǵzaǵa paıdaly ne zııandy bolýy múmkin. Tutynatyn kofeın mólsherin baqylap, kofe ishken soń ózińizdiń jaǵdaıyńyzǵa nazar aýdarý mańyzdy", - dedi dáriger Jansaıa Eskermes.