Kimmen bolsa da beldesemiz, bólip-jarmaımyz – Dzıýdodan ulttyq quramanyń bas bapkeri
Ol bul týraly Kazinform tilshisine bergen suhbatynda aıtyp berdi.
«Qazirgi tańda Qazaqstan quramasy Parıj Olımpıadasyna tas-túıin daıyn. Keshe oıyndardyń jerebesi tartyldy. Tórtjyldyqtyń basty básekesinde osal sportshy bolmaıdy. Jerebege qarap, qarsylasty bólip-jarmaımyz. Dzıýdoshylarymyz namys, abyroıdy birinshi orynǵa qoıyp, eshkimniń tıtýlyna qaramaı kúresedi. Kim myqty, sol jeńiske jetedi», - dedi bas bapker.
Sonymen qatar, búgin qazaqstandyq tatamı sheberleri erteńgi jarys aldyndaǵy salmaq ólsheý rásimine daıyndalyp jatqanyn atap ótti.
«Erteń kúresetin sportshylarymyz búgin jarys aldyndaǵy salmaq ólsheý rásimine qatysady. Erteń birinshi bolyp tatamıge Eldos Smetov pen Ábıba Ábýjaqynova shyǵady. Biz sportshylarymyzǵa árdaıym senemiz jáne qoldaımyz. Bizben birge bolyńyzdar. Jeńisti sátterdiń birge kýási bolaıyq», - dedi ol.
Aıta keteıik, Olımpıadanyń alǵashqy jarys kúni el namysyn tájirıbeli Eldos Smetov (60 kg) pen Abıba Ábýjaqynova (48 kg) qorǵaıdy. Osydan keıin Esmıgýl Kýıýlova (63 kg), Kamıla Berlikash (+78 kg), Ǵusman Qyrǵyzbaev (66 kg), Danııar Shamshaev (73 kg), Abylaıhan Jubanazar (81 kg), Nurlyhan Sharhan (100 kg) synǵa túsedi. Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady.