QMG men Tatneft Qaraton Podsolevoı ýchaskesinde tereńdigi 5500 metr alǵashqy izdeý uńǵymasyn burǵylaýǵa kiristi

<p>ASTANA. KAZINFORM - Atyraý oblysynda burǵylaý jumystaryn bastaý rásimine &laquo;QazMunaıGaz&raquo; UK AQ (QMG) Basqarma tóraǵasy Ashat Hasenov jáne &laquo;Tatneft&raquo; JAQ bas dırektory Naıl Maganov, sondaı-aq QMG Basqarma tóraǵasynyń birinshi orynbasary Qurmanǵazy Esqazıev qatysty.</p>

-Qaraton Podsolevoı ýchaskesinde alǵashqy izdeý uńǵymasyn burǵylaýdy bastaý – Qazaqstannyń resýrstyq bazasyn nyǵaıtýǵa jasalǵan mańyzdy qadam. Bul joba bizdiń qor kólemin ulǵaıtý jáne jer qoınaýynyń kúrdeli ýchaskelerin ıgerýge baǵyttalǵan strategııalyq mindetterimizge saı keledi. Tatneft kompanııasymen birlesken kúsh-jigerimiz nátıjeli bolyp, elimizdiń munaı-gaz salasyndaǵy áleýetin arttyrýǵa úles qosatynyna senimdimiz, - dep atap ótti A.Hasenov.

Foto: QazMunaıGazdyń baspasóz qyzmeti

-Biz qazaqstandyq áriptestermen túrli baǵytta ózara baılanys ornattyq. Búgingi is-shara – sol seriktestigimizdiń tabysty jalǵasynyń jarqyn kórinisi. Qaraton Podsolevoı ýchaskesiniń áleýeti zor, bul Qazaqstan Úkimetiniń qoldaýynyń arqasynda jańa tabysty ortaq jobalardyń negizine aınala alady, - dep atap ótti «Tatneft» JAQ bas dırektory Naıl Maganov.

«Qaraton Podsolevoı» jobasy elimizdegi kúrdeli ken oryndarynyń ınvestıtsııalyq tartymdylyǵyn edáýir arttyrǵan Jaqsartylǵan modeldik kelisimshart sheńberinde iske asyrylýda. Bul mehanızm jer qoınaýynyń kúrdeli ýchaskelerin barlaý jáne ıgerý úshin jaǵdaı jasaı otyryp, mańyzdy retteýshi jáne fıskaldy preferentsııalardy usynady.

Foto: QazMunaıGazdyń baspasóz qyzmeti

Jer qoınaýynda tereń ornalasqan kómirsýtekterdi izdeý tehnıkalyq turǵydan úlken qıyndyqtarmen qatar júredi, oǵan berilgen tereńdik, yqtımal joǵary qabat qysymy, kúkirtti sýtektiń bolýy jáne qalyń tuz shógindilerin jatqyzýǵa bolady.

Qaraton Podsolevoı ýchaskesi Teńiz iri ken orny men «Embimunaıgaz» kompanııasynyń ken oryndaryna jaqyn ornalasqan.

Foto: QazMunaıGazdyń baspasóz qyzmeti