«QMG» kompanııasynyń satyp alýlaryndaǵy qazaqstandyq úles 46 paıyzdy qurap otyr
Bul týraly kompanııanyń baspasóz qyzmetinen habarlandy.
Keltirilgen derekterge súıensek, 2011 jyldyń 6 aıynda «QMG» kompanııalary tobynyń jalpy satyp alý kólemi 1,28 trln. teńgeni qurady. Bunyń ishinde 753,2 mlrd. teńgege taýar, 215,5 mlrd. teńgege - jumys, 315 mlrd. teńgege - qyzmet satyp alynǵan. «Bul rette jalpy satyp alý kólemindegi qazaqstandyq úles 596,6 mlrd. teńgeni, nemese 46 paıyzdy qurap otyr. Onyń ishinde taýarlar - 34 paıyz, jumystar - 61 paıyz, qyzmetterdi kórsetýdi satyp alý - 66 paıyzdy quraıdy», - delingen baspasóz aıǵaǵynda.
Budan bólek, kompanııa 2011 jyldyń birinshi jartysynda eńbekti qorǵaý jáne tehnıka qaýipsizdigi sharalaryna 2,7 mlrd. teńge jumsaǵan. Bul ótken jyldyń osy merzimimen salystyrǵanda 3,4 ese artyq kórsetkish. «QMG» parnıktik gazdardyń shyǵaryndylaryn basqarýdyń Korporatıvtik júıesin damytý, sondaı-aq halyqaralyq tájirıbeni paıdalana otyryp, munaıdyń tógilýin erte baıqap jáne jedel den qoıý jónindegi Ulttyq júıe jobasy tujyrymdamasyn jasaý jumystaryn odan ári jalǵastyrýda», - delingen baspasóz paraǵynda.